Kompania amerikane CWP ka prezantuar sot projektin për ndërtimin e parkut eolik në Tropojë, një investim me kapacitet të pritshëm prej 600 MW, që konsiderohet si investimi më i madh amerikan në sektorin energjetik në Shqipëri.
Në prezantim morën pjesë Kryeministri Edi Rama dhe zv/kryeministrja, njëherësh ministre e Infrastrukturës dhe Energjisë, Belinda Balluku, të cilët e cilësuan projektin si një hap konkret drejt diversifikimit të burimeve energjetike dhe rritjes së sigurisë energjetike të vendit.
Zv/kryeministrja Balluku deklaroi se bashkëpunimi me kompaninë amerikane CWP ka qenë i shkëlqyer dhe se pas Tropojës, e njëjta kompani planifikon ndërtimin e një parku tjetër eolik në Pukë.
Sipas Ballukut, që prej vitit 2018 Shqipëria ka ndjekur një strategji për diversifikimin e burimeve të energjisë, fillimisht përmes energjisë diellore dhe më pas asaj eolike. Ajo bëri të ditur se aktualisht mbi 1.5 miliardë euro investime private janë në proces në sektorin energjetik, ndërsa në total angazhimi i investimeve arrin mbi 2 miliardë euro.
Ministrja theksoi se portofoli i projekteve energjetike do të çojë kapacitetet e instaluara përtej 1500 MW, duke nënvizuar se parqet eolike kërkojnë studime dhe ndërtim më kompleks, por rrisin qëndrueshmërinë e vendit ndaj ndryshimeve klimatike.
Ajo shtoi se këto investime ulin varësinë nga importet e energjisë, krijojnë vende pune dhe forcojnë ekonominë lokale. Paralelisht, Shqipëria po investon në linjat e transmetimit dhe lidhjet ndërkufitare, duke përmendur përfundimin pothuajse të plotë të linjës drejt Maqedonisë së Veriut.
Nga ana e saj, drejtuesi për Europën i kompanisë amerikane CWP falënderoi zv/kryeministren Balluku dhe Ministrinë e Infrastrukturës dhe Energjisë për bashkëpunimin, duke e cilësuar projektin e Tropojës si një hap të rëndësishëm për zhvillimin e energjisë së erës në rajon. /skyweb.al
