Sistemi AIPS–EURO ka shënuar një vit rekord në 2025, si në numrin ashtu edhe në vlerën e transaksioneve të kryera nga klientët bankarë.
Sipas të dhënave zyrtare nga Banka e Shqipërisë, gjatë vitit 2025 u realizuan 398 mijë transaksione, një rritje e ndjeshme krahasuar me vitet e mëparshme. Për krahasim, në vitin 2024 u regjistruan rreth 325 mijë transaksione, ndërsa në vitin 2023 vetëm 249 mijë.
Kjo tregon se përdorimi i pagesave në euro përmes sistemit AIPS po rritet me ritme të shpejta, duke reflektuar një integrim gjithnjë e më të madh të ekonomisë shqiptare me tregjet evropiane.
Jo vetëm numri, por edhe vlera e transaksioneve ka njohur rritje të fortë. Gjatë vitit 2025, përmes AIPS–EURO u transferuan mbi 6.3 miliardë euro, nga rreth 5.2 miliardë euro në 2024. Në vetëm tre vite, vlera e pagesave është rritur me afro 50%, një tregues i qartë i zgjerimit të aktivitetit financiar dhe tregtar në euro.
Nëse shohim ecurinë mujore, muaji dhjetor rezulton më i forti i vitit 2025, si për numrin ashtu edhe për vlerën e transaksioneve. Vetëm në dhjetor u kryen mbi 42 mijë pagesa, me një vlerë prej rreth 716 milionë euro. Ky kulm lidhet kryesisht me mbylljen e vitit fiskal, pagesat e bizneseve dhe rritjen e aktivitetit tregtar në fundvit.
Në krahun tjetër, janari dhe shkurti janë muajt më të qetë, duke pasqyruar ritmin tradicionalisht më të ngadaltë të ekonomisë në fillim të vitit.
Në përgjithësi, 2025 konfirmon maturimin e sistemit AIPS–EURO, rritjen e besimit të qytetarëve dhe bizneseve në pagesat elektronike në euro, si dhe një ekonomi gjithnjë e më të orientuar drejt standardeve evropiane të qarkullimit financiar.
Në ndryshim nga mënyra joefikase e funksionimit të mëparshëm të tregut nëpërmjet bankave korrespondente jashtë vendit, operimi i Sistemit AIPS Euro i mundëson qytetarëve shqiptarë kryerjen e pagesave në euro brenda vendit me kosto shumë më të ulët dhe brenda një afati kohor shumë më të shkurtër nga procesi i mëparshëm i kryer nëpërmjet bankave korrespondente. /scantv.al
