Shqipëria do të jetë sërish pjesë e panairit ndërkombëtar të turizmit FITUR, që zhvillohet në Madrid në datat 21–25 janar.
Lajmi është bërë i ditur nga Kryeministri Edi Rama përmes rrjeteve sociale, ku thekson se pjesëmarrja në këtë panair përbën një mundësi të rëndësishme për promovimin e turizmit shqiptar në tregjet ndërkombëtare.
Në këtë edicion, Shqipëria do të prezantohet me sloganin “Albania All Senses”, duke sjellë për vizitorët emocionet, shijet, kulturën dhe traditat vendase.
“Shqipëria rikthehet në Madrid për të prezantuar emocionet, shijet dhe traditat tona unike. Nga 21–25 janar, në panairin ndërkombëtar të turizmit FITUR, vijojmë traditën e pjesëmarrjes sonë, duke prezantuar diversitetin e jashtëzakonshëm turistik që ofron vendi ynë dhe duke ftuar vizitorë nga Spanja dhe nga e gjithë bota të zbulojnë magjinë e Shqipërisë”, shkruan Rama.
Panairi FITUR konsiderohet një nga eventet më të mëdha ndërkombëtare në fushën e turizmit dhe shërben si një platformë e rëndësishme për promovimin e destinacioneve turistike, kulturës dhe trashëgimisë së vendeve pjesëmarrëse. /skyweb.al
