Administrata Tatimore ka nisur nga data 16 janar 2026 kontrollet në terren në sektorin e ndërtimit, pas përfundimit të një fushate informuese 30 ditore të zhvilluar përmes sistemit e-Filing, e cila u adresua kompanive të këtij sektori.
Sipas të dhënave zyrtare, kontrollet e para janë ushtruar në disa prej agjencive imobiliare më të mëdha në vend, ku gjatë një dite janë verifikuar 9 subjekte. Nga këto kontrolle janë evidentuar shkelje që lidhen me deklarimin e çmimeve të shitjes së apartamenteve, nëndeklarimin e pagave të punonjësve dhe mospërputhje në dokumentacionin financiar.
Administrata Tatimore bën me dije se gjatë veprimeve në terren janë sekuestruar pajisje kompjuterike, të cilat do të përdoren si prova materiale për dokumentimin e shkeljeve dhe për referimin e rasteve në organet përkatëse të drejtësisë.
Paralelisht me kontrollet, Drejtoria e Përgjithshme e Tatimeve ka bërë publike gjetjet e “Planit të menaxhimit të riskut për sektorin e ndërtimit”, dokument që evidenton nivel të lartë informaliteti dhe risk financiar në këtë sektor.
Sipas këtij dokumenti, ndërtimi paraqet problematika të vazhdueshme, përfshirë shitje të pasurive të paluajtshme me çmime më të ulëta se ato të tregut dhe nën çmimet referencë, arkëtime pa faturë në fazat e hershme të ndërtimit, përdorim të parasë cash, si dhe deklarime të pjesshme të të ardhurave.
Një tjetër element i identifikuar është nëndeklarimi i kostove të punës, ku numri i punonjësve të deklaruar rezulton shpesh i papërputhshëm me volumin real të punimeve, ndërsa pagat e raportuara janë ndjeshëm më të ulëta se niveli mesatar i tregut për profesionet e ndërtimit.
Plani i riskut evidenton gjithashtu përdorimin e furnitorëve fiktivë dhe faturave të rreme për fryrjen artificiale të kostove, çka ndikon drejtpërdrejt në uljen e fitimit të tatueshëm dhe të detyrimeve tatimore.
Administrata Tatimore thekson se sektori i ndërtimit mbart risk të shtuar për pastrim parash, për shkak të vëllimit të lartë të transaksioneve cash dhe vështirësive në gjurmimin e burimit real të fondeve.
Në kuadër të këtij aksioni, kontrollet do të shtrihen në verifikimin e tatimit mbi fitimin, TVSH-së, faturimit, pagesave ndaj jorezidentëve, deklarimeve të pagave dhe krahasimit të të dhënave financiare me lejet e ndërtimit dhe sipërfaqet reale të projekteve.
Për hartimin e planit sektorial janë analizuar 8,784 tatimpagues aktivë në ndërtim, nga të cilët 51 për qind janë shoqëri me përgjegjësi të kufizuar. Sipas shpërndarjes gjeografike, 47 për qind e subjekteve janë të përqendruara në Tiranë dhe 14 për qind në Durrës.
Në total, sektori numëron mbi 64 mijë të punësuar, ku shumica deklarohen në fashat e ulëta të pagave, ndërsa vetëm një pjesë e vogël rezulton me paga mbi 120 mijë lekë.
Administrata Tatimore njofton se subjektet që do të kategorizohen me risk të lartë, në bazë të analizës së të dhënave dhe mospërputhjeve të konstatuara, do t’i nënshtrohen kontrolleve të thelluara, monitorimit dhe masave administrative, në përputhje me ligjin në fuqi. /skyweb.al
