Dy kompani të internetit në Shqipëri, MC Networking dhe Abissnet, janë ankuar pranë Komisionit të Prokurimit Publik në lidhje me kriteret e tenderit 1.3 milion euro të internetit dhe intranetit të Postës Shqiptare duke paralajmëruar për paracaktim te fituesit.
Sipas operatorëve, dokumentet e tenderit janë përpiluar në mënyrë të tillë që të përjashtojnë shumicën e garuesve, duke vendosur kushte të papërmbushshme për pjesëmarrje dhe që, sipas tyre, krijojnë terren të qartë për favorizim.
Në thelb të ankesë është një kërkesë e Postës Shqiptare që detyron operatorët të kenë një rrjet të vetin nëntokë në të gjitha qytetet dhe pikat e shërbimit të Postës Shqiptare. Sipas ankuesve, këtë kusht nuk e përmbush asnjë kompani në Shqipëri.
Ata theksojnë se ligji u jep të drejtën të ofrojnë shërbime edhe përmes marrëveshjeve me operatorë të tjerë, por kjo formë është përjashtuar nga dokumentacioni i tenderit.
Një tjetër pikë kontestuese është kërkesa për 30 punonjës të diplomuar dhe të certifikuar në fusha shumë të veçanta si rrjete kompjuterike, siguri kibernetike dhe menaxhim projektesh, një standard që operatorët e quajnë “i ekzagjeruar dhe i pajustifikuar” për një kontratë të tillë. Kërkohet gjithashtu që operatori të dëshmojë se zotëron një qendër për përballimin e sulmeve kibernetike DDoS, e shoqëruar me kontrata dhe autorizime nga kompani ndërkombëtare.
Përfaqësuesit e kompanive thonë se ky tender është një shembull i qartë se si prokurimet publike mund të mbyllen me një derë të madhe për shumë operatorë dhe të hapin rrugën vetëm për një të preferuar. /skyweb.al
