Skema e bllokimit të tenderëve përmes ankimimeve të njëpasnjëshme duket se po përsëritet edhe në procedurën për shërbimin e internetit dhe intranetit për institucionet publike, duke rrezikuar ndërprerjen e një shërbimi jetik për administratën.
Pak ditë më parë, siç raportoi edhe skyweb.al, Agjencia Kombëtare e Shoqërisë së Informacionit shpalli fituesit e tenderit të madh për internetin dhe intranetin institucional, ku u përzgjodhën tre operatorë: MC Networking, Abissnet dhe Digicom.
Megjithatë, procedura rrezikon të mbetet sërish e bllokuar, për shkak të ankimimeve që po depozitohen në Komisionin e Prokurimit Publik.
MC Networking, Abissnet, Digicom dhe ATU fitojnë tenderin e madh të internetit për institucionet
Sipas të dhënave të konsultuara nga skyweb.al, gjatë ditës së djeshme në Komisionin e Prokurimit Publik është dorëzuar një ankimim nga kompania Albanian Satellite Communications, e cila ka dhënë një ofertë mbi fondin limit (shih tabelën).
Subjekti kërkon rivlerësim të dokumentacionit të tenderit, ndërkohë që për shqyrtimin e ankesës ka paguar një tarifë rreth 26 mijë euro vetëm si komision pranë KPP.
OFERTUESIT
Tenderi në fjalë ka pasur një histori të gjatë bllokimesh. Në fazat e mëparshme, disa kompani kishin depozituar ankesa duke pretenduar se kërkesat teknike të vendosura nga AKSHI nuk përputheshin me fondin limit të parashikuar.
Për shkak të këtyre pretendimeve, Komisioni i Prokurimit Publik vendosi anulimin e procedurës fillestare, duke i hapur rrugë rishpalljes së saj pas rishikimit të dokumentacionit nga AKSHI.
Ankimimi i fundit pritet të zgjasë edhe më tej afatet e procedurës, duke shtuar rrezikun që institucionet publike të mbeten pa shërbimin e internetit dhe intranetit.
Burime pranë procesit bëjnë me dije se ekziston mundësia që edhe operatorë të tjerë pjesëmarrës të depozitojnë ankime të reja, çka mund ta thellojë edhe më shumë ngërçin administrativ. /skyweb.al
