Kryeministri i Greqisë, Kyriakos Mitsotakis, ka hapur zyrtarisht dialogun kombëtar për Rishikimin Kushtetues, duke e vendosur theksin te nevoja për një kornizë të re qeverisëse që garanton stabilitet ekonomik, disiplinë fiskale dhe parashikueshmëri për zhvillimin afatgjatë të vendit.
Në mesazhin drejtuar qytetarëve, Mitsotakis theksoi se Kushtetuta aktuale, e miratuar në vitin 1975, nuk i përgjigjet më plotësisht sfidave të ekonomisë moderne, as kërkesave të një shteti që synon rritje të qëndrueshme, konkurrueshmëri dhe mbrojtje nga ciklet e krizave financiare.
Sipas tij, rishikimi kushtetues duhet të përfshijë rregulla të qarta që sigurojnë ekuilibër të përhershëm fiskal dhe funksionim të qëndrueshëm të qeverisjes, duke shmangur politikat populiste që në të kaluarën kanë çuar në kosto të rënda ekonomike për vendin. Mitsotakis nënvizoi se Greqia ka paguar shtrenjtë mungesën e kontrollit fiskal dhe premtimet e pambuluara, duke e lidhur drejtpërdrejt rishikimin kushtetues me mbrojtjen e ekonomisë kombëtare nga rreziqe të ngjashme në të ardhmen.
“Një Kushtetutë moderne duhet të parashikojë mekanizma kontrolli që garantojnë korrektësinë e premtimeve politike, stabilitetin buxhetor dhe një veprim qeveritar të përgjegjshëm”, u shpreh kryeministri, duke shtuar se këto elemente janë thelbësore për të ruajtur besimin e qytetarëve, investitorëve dhe tregjeve.
Ai theksoi gjithashtu se rishikimi kushtetues duhet të marrë parasysh sfidat e reja ekonomike të epokës, përfshirë ndikimin e inteligjencës artificiale në tregun e punës dhe ekonominë, si edhe pasojat ekonomike të krizës klimatike. Sipas Mitsotakis, këto zhvillime kërkojnë rregullim institucional afatgjatë dhe politika publike që nuk ndryshojnë sipas cikleve elektorale.
Në këtë kontekst, kryeministri grek i bëri thirrje partive politike dhe shoqërisë të angazhohen në një debat konstruktiv, përtej interesave afatshkurtra partiake. Ai theksoi se një rishikim kushtetues i suksesshëm kërkon konsensus të gjerë, pasi vetëm një marrëveshje e qëndrueshme politike mund të garantojë stabilitet institucional dhe ekonomik në afatgjatë.
“Vetë Kushtetuta kërkon konsensus për të arritur ndryshime të mëdha”, u shpreh Mitsotakis, duke e cilësuar procesin si një hap të domosdoshëm për ndërtimin e një demokracie moderne europiane dhe një ekonomie më të fortë, më rezistente dhe më të mbrojtur nga krizat e së kaluarës.
