Në vitin 2021, Acclarent, një njësi e Johnson & Johnson, shtoi inteligjencë artificiale (AI) në pajisjen mjekësore TruDi Navigation System, e përdorur për trajtimin kirurgjikal të sinusit kronik. Kompania e quajti këtë një “hap të madh përpara”. Por që pas integrimit të AI-së, raportet e dërguara në FDA për keqfunksionime dhe ngjarje të padëshiruara u rritën ndjeshëm: nga disa raste para vitit 2021, në mbi 100 raporte pas shtimit të AI-së, përfshirë të paktën 10 pacientë të lënduar deri në fund të vitit 2025, shkruan Reuters.
Shumë nga incidentet e raportuara lidhen me gabime të sistemit në përcaktimin e saktë të pozicionit të instrumenteve kirurgjikale brenda kokës së pacientëve. Në disa raste të rënda, pacientët pësuan rrjedhje të lëngut cerebrospinal, shpim të bazës së kafkës dhe madje goditje në tru pasi u dëmtuan arterie kryesore. Dy pacientë kanë ngritur padi, duke pretenduar se AI e integruar në TruDi kontribuoi drejtpërdrejt në dëmtimet e tyre.
Kompania mohon çdo lidhje shkakësore mes AI-së dhe dëmtimeve, duke thënë se raportet e FDA-së vetëm tregojnë se pajisja ishte në përdorim gjatë operacioneve ku ndodhën komplikime. FDA vetë paralajmëron se këto raporte janë të paplota dhe nuk provojnë shkakun e drejtpërdrejtë të incidenteve.
Rasti i TruDi nuk është i vetmi. Aktualisht, mbi 1.350 pajisje mjekësore me AI janë të autorizuara nga FDA – dyfish më shumë se në vitin 2022. Dhjetëra prej tyre janë përfshirë në raporte për keqfunksionime, ndërsa një studim akademik zbuloi se pajisjet me AI kanë një normë rikthimi (recall) gati dy herë më të lartë se pajisjet e tjera.
Ndërkohë, FDA po përballet me mungesë kapacitetesh për të mbikëqyrur këtë bum teknologjik, pasi ka humbur një pjesë të konsiderueshme të stafit të specializuar në AI. Kjo ngre shqetësime serioze se përhapja e shpejtë e inteligjencës artificiale në mjekësi po ecën më shpejt se aftësia e rregullatorëve për të garantuar sigurinë e pacientëve. /skyweb.al
