Drejtoria e Përgjithshme e Shërbimeve të Transportit Rrugor ka publikuar një njoftim për subjektet që ushtrojnë veprimtarinë e autoriparimit, duke theksuar detyrimet ligjore që duhet të përmbushin për të shmangur masat administrative dhe për të garantuar sigurinë teknike të mjeteve.
Institucioni rikujton se një nga kërkesat kryesore është mbajtja dhe plotësimi i rregullt i regjistrit të veprimtarisë, i cili duhet të jetë kronologjik dhe i verifikueshëm.
Ky regjistër konsiderohet element thelbësor për gjurmueshmërinë e shërbimeve të kryera dhe për kontrollin e standardeve teknike në servise.
Sipas njoftimit, krahas regjistrit, subjektet duhet të disponojnë licencë të vlefshme për aktivitetin përkatës, ambiente dhe pajisje të përshtatshme për shërbimet që ofrojnë, si edhe një drejtues teknik të pajisur me dokumentacionin përkatës profesional.
Autoriteti paralajmëron se mosplotësimi i këtyre kushteve sjell masa administrative sipas legjislacionit në fuqi. Për këtë arsye, subjektet që operojnë në fushën e autoriparimit ftohen të verifikojnë dokumentacionin dhe mënyrën e funksionimit, për t’u siguruar që aktiviteti zhvillohet në përputhje me standardet ligjore.
Njoftimi synon rritjen e kontrollit në sektor dhe formalizimin e shërbimeve të autoriparimit, duke vendosur theks të veçantë te transparenca dhe siguria teknike e mjeteve që qarkullojnë në rrugë. /skyweb.al
