Bizneset dhe sipërmarrësit e përfshirë në procedime penale mund të bllokohen përkohësisht nga lidhja e kontratave me institucionet shtetërore.
Masa e re parashikohet në ndryshimet e Kodit Penal të propozuara nga qeveria dhe synon mbrojtjen e fondeve publike gjatë zhvillimit të hetimeve.
Kodi aktual parashikon masa ndaluese si pezullimi nga detyra publike ose ndalimi i përkohshëm i ushtrimit të një veprimtarie profesionale apo tregtare. Drafti shton posaçërisht edhe ndalimin për të lidhur kontrata me autoritetet publike. Masa nuk vendoset automatikisht sapo nis një hetim. Ajo duhet të kërkohet gjatë procedimit dhe të miratohet nga gjykata ndaj personit ose subjektit që ka marrë cilësinë e të pandehurit, raporton skyweb.al.
Nëse gjykata e cakton këtë masë, biznesi ose sipërmarrësi nuk mund të nënshkruajë kontrata me institucionet shtetërore gjatë periudhës që ndalimi mbetet në fuqi.
Në praktikë, kjo mund të pengojë lidhjen e kontratave të fituara përmes tenderëve, koncesioneve apo procedurave të tjera të prokurimit publik.
Projektligji parashikon që masa të përdoret veçanërisht në procedimet për krime kundër veprimtarisë shtetërore. Në këto raste, gjykata mund ta vendosë edhe jashtë kufijve të zakonshëm të dënimit të kërkuar për masat ndaluese.
Ndalimi nuk përfshin kontratat përmes të cilave i pandehuri përfiton shërbime publike që autoritetet kanë detyrimin t’ia ofrojnë.
Kjo do të thotë se masa prek marrëdhëniet tregtare me shtetin, por jo furnizimin me energji, ujë apo shërbime të tjera publike.
Qëllimi është të pengohet përdorimi i kontratave shtetërore për vazhdimin ose përsëritjen e veprimtarisë së dyshuar dhe të mbrohen paratë publike deri në përfundimin e procedimit.
Ndalimi është i përkohshëm dhe nuk përbën dënim apo shpallje fajësie. Për zbatimin e tij kërkohet në çdo rast një vendim gjykate. /skyweb.al
