Qytetarët dhe bizneset do të mund të kryejnë transferta bankare të menjëhershme deri në 500 mijë lekë ose 5 mijë euro për çdo pagesë. Paratë pritet të kalojnë nga llogaria e dërguesit te ajo e përfituesit brenda një intervali maksimal prej 10 sekondash.
Kufiri prej 500 mijë lekësh ose 5 mijë eurosh nuk lidhet me gjendjen e llogarisë dhe as me shumën totale që një klient mund të mbajë në bankë. Ai është tavani për një transfertë të vetme nëpërmjet sistemit “TIPS Clone Albania”. Pagesat mbi këtë shumë do të duhet të kryhen përmes sistemeve të tjera bankare.
Banka e Shqipërisë synon ta vendosë sistemin në funksion gjatë nëntorit 2026 dhe, më së voni, deri në fund të muajit. Projekti po zbatohet në bashkëpunim me Bankën e Italisë, Bankën Qendrore Europiane dhe bankat shqiptare.
Sistemi do të funksionojë 24 orë në ditë, shtatë ditë në javë dhe gjatë gjithë vitit. Një transfertë e bërë në mbrëmje, të dielën apo gjatë një feste zyrtare do të përpunohet njësoj si gjatë orarit bankar.
Qytetari do ta japë urdhrin përmes bankës ose institucionit ku ka llogarinë. Sistemi kontrollon disponueshmërinë e fondeve dhe, nëse pagesa pranohet, shuma kalon menjëherë në llogarinë e përfituesit.
Pagesat do të mund të kryhen në lekë dhe euro, si ndërmjet individëve, ashtu edhe nga qytetarët drejt bizneseve për blerjen e mallrave apo shërbimeve.
Përpara autorizimit, paguesi do të informohet nëse emri dhe të dhënat e vendosura përputhen me llogarinë e përfituesit. Ky verifikim synon të ulë rrezikun e dërgimit të parave te personi ose subjekti i gabuar.
“TIPS Clone” nuk është një platformë vetëm shqiptare. Sistemi rajonal, i zhvilluar nga Banka e Italisë, nisi funksionimin më 20 korrik me Bosnjë-Hercegovinën dhe Malin e Zi. Shqipëria, Kosova dhe Maqedonia e Veriut pritet t’i bashkohen në nëntor.
Platforma është ndërtuar mbi teknologjinë e sistemit europian TIPS, por fillimisht do të funksionojë si një infrastrukturë e pavarur. Lidhja e drejtpërdrejtë me sistemin e pagesave të menjëhershme të Eurozonës parashikohet në një fazë të mëvonshme.
Sistemi i ri ndryshon edhe nga SEPA. Kjo e fundit standardizon dhe ul kostot e transfertave në euro, ndërsa “TIPS Clone” mundëson shlyerjen e pagesës në kohë reale.
Banka e Shqipërisë vlerëson se përhapja e pagesave elektronike mund t’i kursejë sistemit financiar deri në 35 miliardë lekë dhe ekonomisë në tërësi deri në 38 miliardë lekë në vit.
Projektrregullorja krijon edhe bazën për pagesat pranë tregtarëve, por nuk e përcakton QR-në si mënyrë të detyrueshme. Forma konkrete e nisjes së pagesës do të varet nga shërbimet që do të ofrojnë bankat dhe institucionet e pagesave.
Ende nuk janë publikuar tarifat përfundimtare për klientët, lista e plotë e institucioneve pjesëmarrëse dhe data e saktë e aktivizimit të sistemit. /skyweb.al
