Monedha europiane ka vijuar rënien përballë lekut, duke regjistruar këtë të hënë nivelin më të ulët të shënuar ndonjëherë në tregun vendas.
Sipas kursit zyrtar të Bankës së Shqipërisë, një euro u këmbye me 94.89 lekë, duke thelluar zhvlerësimin që ka karakterizuar muajt e parë të vitit.
Që nga fillimi i vitit 2026, euro ka humbur rreth 1.9% të vlerës ndaj lekut. Krahasuar me të njëjtën periudhë të një viti më parë, rënia llogaritet në afërsisht 3.2%.
Operatorët e tregut valutor e lidhin dobësimin e fundit me shtimin e ofertës së euros pas nisjes së sezonit veror. Hyrja e turistëve dhe rritja e shpenzimeve në valutë kanë shtuar sasinë e euros në qarkullim, duke ushtruar presion të mëtejshëm mbi kursin e këmbimit.
Megjithatë, presionet zhvlerësuese kishin nisur që në tremujorin e parë, përpara se flukset turistike të arrinin nivelet e sezonit.
Përveç turizmit, ndikim në treg besohet se po japin edhe hyrjet valutore të lidhura me investimet në pasuri të paluajtshme dhe sektorin e ndërtimit.
Në diskutimet për forcimin e pazakontë të lekut përmenden gjithashtu flukse valutore me origjinë informale ose të paligjshme, megjithëse pesha konkrete e tyre në kursin e këmbimit mbetet e vështirë për t’u matur.
Dobësimi i euros favorizon importuesit dhe individët që kanë kredi apo detyrime në monedhën europiane, por ul të ardhurat në lekë për eksportuesit, familjet që marrin remitanca dhe bizneset turistike që arkëtojnë kryesisht në euro.
