Në një kohë kur në Tiranë protestohet prej dy javësh për zhvillimet në Zvërnec, e ngarkuara me punë e Ambasadës së Shteteve të Bashkuara, Nancy VanHorn, ka përcjellë një mesazh për klimën e investimeve dhe mbrojtjen e interesave kombëtare.
Gjatë prezantimit të mekanizmit shqiptar për shqyrtimin e investimeve të huaja direkte, VanHorn deklaroi se investimet që nxisin zhvillimin ekonomik duhet të mirëpriten, por pa cenuar sigurinë kombëtare, infrastrukturën kritike dhe sektorët strategjikë.
Diplomatja iu referua politikës së investimeve të shpallur nga presidenti amerikan Donald Trump, duke theksuar se edhe qasja e Shqipërisë mbështetet mbi të njëjtin parim.
“Kur presidenti Trump shpalli politikën e investimeve të Amerikës vitin e kaluar, ai theksoi një parim të thjeshtë: mirëpritni investimet që forcojnë rritjen ekonomike, duke siguruar që infrastruktura kritike dhe sektorët strategjikë të mbeten të sigurt”, deklaroi VanHorn.
Sipas saj, miratimi i kuadrit ligjor është vetëm hapi i parë, ndërsa suksesi do të varet nga mënyra se si ai do të zbatohet në praktikë.
“Miratimi i një ligji është fillimi, jo fundi. Zbatimi është vendi ku këto përpjekje kanë sukses ose dështojnë dhe Shtetet e Bashkuara do të vazhdojnë ta mbështesin Shqipërinë gjatë këtij procesi”, u shpreh ajo.
VanHorn theksoi se mekanizmi për kontrollin e investimeve të huaja nuk duhet parë si një procedurë e zakonshme administrative, por si një vendim me rëndësi strategjike për vendin.
“Kuadri i shqyrtimit të investimeve të huaja direkte të Shqipërisë nuk është thjesht një ushtrim burokratik. Është një deklaratë strategjike. Tregon se Shqipëria është e hapur për biznes, por në një mënyrë që mbron interesat kombëtare dhe plotëson standardet ndërkombëtare”, tha ajo.
Diplomatja amerikane deklaroi gjithashtu se investitorët e huaj po ndjekin nga afër zhvillimet në klimën shqiptare të biznesit.
Sipas saj, kompani amerikane janë tashmë aktive në sektorë si energjia, ndërtimi dhe teknologjia, ndërsa të tjera po shqyrtojnë mundësinë për të investuar në vend.
Megjithatë, VanHorn nënvizoi se kapitali i huaj kërkon siguri juridike, rregulla të qarta dhe trajtim të barabartë.
“Investitorët kanë nevojë për besim se rregullat janë të qarta, se fusha e lojës është e barabartë dhe se sektorët strategjikë janë të mbrojtur nga aktorë që nuk luajnë sipas të njëjtave rregulla si ne”, deklaroi ajo.
Shtetet e Bashkuara, sipas VanHorn, do të vazhdojnë të bashkëpunojnë me institucionet shqiptare për zbatimin e mekanizmit, me synimin që vendi të tërheqë investime afatgjata dhe cilësore.
Deklaratat e saj vijnë ndërsa projektet e planifikuara në Sazan dhe Zvërnec vijojnë të jenë në qendër të debatit publik dhe të protestave në Tiranë.
Mesazhi i VanHorn nuk iu referua drejtpërdrejt këtyre projekteve, por theksi mbi mbrojtjen e interesave kombëtare, transparencën dhe sigurinë e sektorëve strategjikë përkon me debatin e hapur për investimet e mëdha në bregdet.
Një ditë më parë, kryeministri Edi Rama mbrojti projektet, duke deklaruar se kundërshtimi i investimeve të mëdha dëmton klimën e biznesit, sezonin turistik dhe imazhin ndërkombëtar të Shqipërisë.
