Tregu i pagesave elektronike në Shqipëri po kalon në një fazë ristrukturimi, ku rritja e infrastrukturës digjitale po shoqërohet me një tkurrje të pranisë së bankomateve në disa rajone.
Të dhënat më të fundit tregojnë se gjatë vitit 2025 numri i ATM-ve ka rënë në Elbasan dhe Korçë, në një kohë kur përdorimi i terminaleve POS po zgjerohet me ritme të shpejta.
Në Elbasan, bankomatet rezultojnë më pak krahasuar me një vit më parë, ndërsa në Korçë rënia është edhe më e dukshme, duke reflektuar një zhvendosje graduale nga tërheqja e cash-it drejt pagesave elektronike. Ky zhvillim vjen paralelisht me rritjen e fortë të terminaleve POS në shumë qytete, sidomos në zonat me aktivitet turistik dhe tregtar.
Ndërkohë, infrastruktura e pagesave me kartë ka shënuar një zgjerim të ndjeshëm në qytetet jashtë kryeqytetit. Rritja e POS-eve në disa rajone ka qenë shumë më e lartë se mesatarja kombëtare, duke treguar se bizneset po investojnë gjithnjë e më shumë në kanale alternative pagesash për të përmbushur kërkesën e klientëve.
Ky trend lidhet ngushtë me ndryshimin e sjelljes së konsumatorëve dhe me rritjen e turizmit, që ka shtuar kërkesën për pagesa pa para fizike. Bizneset, veçanërisht në qytetet me fluks vizitorësh, po e shohin praninë e terminaleve POS si një kusht të domosdoshëm për konkurrueshmërinë dhe për tërheqjen e klientëve.
Në nivel kombëtar, Tirana mbetet rajoni me numrin më të madh të pajisjeve, por ritmi i rritjes atje është më i ulët, çka tregon se tregu në kryeqytet po i afrohet maturimit, ndërsa zgjerimi real po ndodh në zonat e tjera.
Rënia e ATM-ve në disa qytete dhe rritja e POS-eve në të gjithë vendin sinjalizon një ndryshim strukturor në mënyrën si kryhen pagesat, me Shqipërinë që po lëviz gradualisht drejt një ekonomie gjithnjë e më pak të varur nga cash-i.
