Aeroporti Ndërkombëtar i Tiranës po hyn në një fazë të re strategjike zhvillimi, ku fokus i veçantë po i jepet fluturimeve ndërkontinentale dhe zgjerimit të rrjetit përtej Europës.
Një nga zhvillimet më të rëndësishme është nisja e fluturimeve direkte me Kanadanë nga qershori 2026, që shënon hyrjen e parë të Shqipërisë në segmentin e fluturimeve të gjata.
Manjola Kaso, Drejtoresha për Zhvillimin e Aviacionit dhe Marketing në Tirana Internatioal Airport, tha në një intervistë për Monitor se kompania Air Transat do të operojë fluturime javore direkte drejt Torontos, duke krijuar një lidhje të re strategjike mes Shqipërisë dhe Amerikës së Veriut.
Ky konsiderohet një moment historik për Rinasin, pasi për herë të parë aeroporti do të ketë një linjë të rregullt “long haul”.
Fluturimet pritet të shërbejnë jo vetëm për diasporën shqiptare në Kanada, por edhe për pasagjerë tranzit nga rajoni, duke rritur rolin e TIA-s si pikë lidhëse për Ballkanin. Interesi për këtë linjë lidhet me fluksin aktual prej mbi 300 mijë udhëtarësh në vit drejt Amerikës së Veriut, që pritet të rritet ndjeshëm me vendosjen e lidhjes direkte.
HISTORIKE/ Për herë të parë fluturime direkte Shqipëri–Kanada nga TIA përmes Air Transat
Në të njëjtën kohë, aeroporti po vijon programin e zgjerimit të infrastrukturës për të përballuar kërkesën në rritje.
Deri tani janë investuar rreth 150 milionë euro, ndërsa rreth 100 milionë euro të tjera parashikohen në vitet e ardhshme, duke përfshirë zgjerimin e terminalit, shtimin e portave të imbarkimit dhe modernizimin e sistemeve operative.
Zgjerimi i pistës dhe rritja e kapaciteteve të parkimit të avionëve synojnë të mbështesin pikërisht fluturimet ndërkontinentale, të cilat kërkojnë infrastrukturë më të avancuar dhe kapacitete më të mëdha operacionale.
Hapja e linjës me Kanadanë shihet si hapi i parë drejt objektivit për lidhje direkte edhe me Shtetet e Bashkuara, për të cilat aeroporti është në diskutime me operatorë ndërkombëtarë. Kërkesa ekzistuese dhe pozicioni gjeografik i Tiranës pritet ta bëjnë këtë treg konkurrues në rajon.
Në këtë kontekst, fluturimet e Air Transat nuk përfaqësojnë vetëm një destinacion të ri, por një ndryshim të rolit të aeroportit, nga një qendër rajonale e trafikut europian në një portë ndërkontinentale që lidh Shqipërinë dhe Ballkanin me tregjet përtej Atlantikut. /skyweb.al
