Të dhënat e platformës së monitorimit Flightradar24 tregojnë se mëngjesin e së shtunës hapësira ajrore midis Iranit dhe Irakut ishte pothuajse e boshatisur, një tregues i qartë i ndikimit të situatës së sigurisë në operacionet e aviacionit civil.
Turkish Airlines ka anuluar fluturimet drejt një sërë destinacionesh në rajon pasi disa shtete vendosën të mbyllin hapësirat e tyre ajrore. Fluturimet për Libanin, Sirinë, Irakun, Iranin dhe Jordaninë janë anuluar deri më 2 mars, ndërsa linjat drejt Katarit, Kuvajtit, Bahreinit, Emirateve të Bashkuara Arabe dhe Omanit janë ndërprerë për ditën e sotme.
Edhe Air France ka reaguar duke anuluar të gjitha fluturimet për dhe nga Tel Avivi dhe Bejruti për ditën e shtunë, ndërsa kompania holandeze KLM e kishte pezulluar më herët linjën Amsterdam Tel Aviv.
Grupi Lufthansa ka zgjeruar masat e sigurisë duke pezulluar fluturimet për dhe nga Tel Avivi, Bejruti dhe Omani deri më 7 mars, si dhe fluturimet për dhe nga Dubai gjatë fundjavës.
Ndërkohë Wizz Air ka ndërprerë operacionet për dhe nga Izraeli, Dubai, Abu Dhabi dhe Aman deri më 7 mars, ndërsa Japan Airlines ka anuluar fluturimet nga Tokio drejt Dohas dhe kthimin e planifikuar për 1 mars.
Valë anulimesh tregon se situata e sigurisë në rajon mbetet e paqëndrueshme dhe se aviacioni civil është ndër sektorët e parë që reagon ndaj rrezikut të shtuar, duke kufizuar ndjeshëm lëvizjen ajrore në një nga korridoret më të rëndësishme globale të fluturimeve. /skyweb.al
