Nëse je nga ata persona që pas mesnate ndihen më produktivë dhe energjikë, ndoshta është momenti të mendosh më seriozisht për shëndetin tënd.
Sipas një artikulli të CNN, një studim i ri sugjeron se personat që qëndrojnë zgjuar deri vonë kanë më shumë gjasa të zhvillojnë sëmundje të zemrës. Megjithatë, specialistët theksojnë se ka masa konkrete që mund të merren për të ulur këtë rrezik.Studimi përfshiu mbi 322 mijë të rritur që vetëpërcaktuan kronotipin e tyre. Sipas Dr. Sina Kianersi, autore kryesore e studimit dhe bashkëpunëtore kërkimore në Brigham and Women’s Hospital dhe në Harvard Medical School, kronotipi lidhet me prirjen natyrore të një personi për orarin e gjumit dhe ritmin ditor — nëse është zgjuar herët, aktiv natën apo diku në mes.
Rezultatet treguan se personat me kronotip mbrëmjeje, dhe ndoshta edhe ata që zgjohen shumë herët, mund të jenë më të rrezikuar, sidomos kur ora e tyre biologjike nuk përputhet me oraret e punës dhe kërkesat e jetës së përditshme.
Ndërkohë, American Heart Association thekson tetë faktorë kyç për një zemër të shëndetshme: ushqyerja e balancuar, aktiviteti fizik, shmangia e duhanit, gjumi cilësor, si dhe kontrolli i peshës trupore, kolesterolit, sheqerit në gjak dhe tensionit arterial.
Kianersi vuri në dukje se “bufat e natës” shpesh shfaqin më shumë zakone të pashëndetshme, si dietë e dobët, mungesë aktiviteti fizik apo pirje duhani, faktorë që ndikojnë drejtpërdrejt në shëndetin kardiovaskular. Sipas saj, kjo lidhje rezultoi edhe më e fortë tek gratë.
Meqë studimi u fokusua kryesisht tek të rriturit e moshës së mesme dhe të tretë, nevojiten kërkime të tjera për të kuptuar nëse e njëjta prirje vlen edhe për të rinjtë.
Edhe Sabra Abbott, profesoreshë e asociuar e neurologjisë në Feinberg School of Medicine, e cila nuk ishte pjesë e studimit, theksoi se kronotipi mbrëmjeje shpesh shoqërohet me çrregullime në oraret e gjumit, vakteve dhe ekspozimit ndaj dritës, elementë që mund të rrisin rrezikun për sëmundje të zemrës.
Megjithatë, ka hapa të qartë për t’u mbrojtur: ruajtja e një orari të qëndrueshëm gjumi, ekspozimi ndaj dritës së mëngjesit, aktiviteti fizik i rregullt, kontrollet periodike të tensionit, kolesterolit dhe sheqerit në gjak, si dhe ndërprerja e duhanit mbeten ndër masat më të fuqishme për të mbrojtur shëndetin afatgjatë të zemrës.
