Një studim i ri sugjeron se diagnoza me kancer mund të ketë pasoja të thella jo vetëm për shëndetin, por edhe për sjelljen sociale të individëve, madje duke rritur rrezikun e përfshirjes në krim, shkruan The Economist.
Frymëzuar nga skenari i serialit të famshëm Breaking Bad, ku një mësues kimie shndërrohet në trafikant droge pasi mëson se ka kancer terminal, studiues nga Danimarka dhe Holanda kanë analizuar të dhëna afatgjata mbi pacientët me kancer.
Sipas studimit, gjasat që një person i diagnostikuar me kancer të kryejë një krim janë rreth 14% më të larta gjatë dekadës pas diagnozës, krahasuar me normën bazë të individëve që ende nuk janë prekur nga sëmundja.
Studiuesit theksojnë se rritja e rrezikut nuk lidhet domosdoshmërisht me krime të rënda, por me një shtim të përgjithshëm të sjelljeve të paligjshme. Faktorë të mundshëm përfshijnë stresin financiar, ndikimin psikologjik të diagnozës, humbjen e të ardhurave dhe pasigurinë për të ardhmen.
Interesant është fakti se ky efekt vërehet edhe në shtete me sisteme bujare të mirëqenies sociale, si Danimarka dhe Holanda, çka tregon se edhe mbështetja e fortë shtetërore nuk e eliminon plotësisht ndikimin emocional dhe ekonomik të një sëmundjeje të rëndë.
Gjetjet hedhin dritë mbi pasojat e gjera shoqërore të sëmundjeve serioze dhe ngrenë pyetje për nevojën e mbështetjes më të plotë psikologjike dhe sociale për pacientët pas diagnozës. /skyweb.al
