Këshilli i Ministrave propozoi sot disa ndryshime të rëndësishme në ligjin për Forcat e Armatosura, të cilat prekin drejtpërdrejt mënyrën e administrimit dhe destinacionit të pronave ushtarake në territorin e Republikës së Shqipërisë.
Siç konstaton Skyweb.al pas konsultimit të ndryshimeve të propozuara dhe ligjin ekzistues, për herë të parë pronat ushtarake ndahen në dy kategori: ato që janë pjesë e “planit të vendosjes dhe përhapjes” së Forcave të Armatosura, pra pronat ku ushtria zhvillon aktivitetin e saj ditor dhe operacional dhe ato jashtë këtij plani, që mund të përdoren për funksione të tjera.
Ndryshimi më domethënës është hapja ligjore e mundësisë për “përdorim të dyfishtë” të pronave jashtë planit ushtarak, që do të thotë se këto prona mund të jepen me qira, enfiteozë apo forma të tjera, për qëllime zhvillimore apo ekonomike, për aq kohë sa nuk preken kapacitetet operacionale të ushtrisë. Kriteret për këtë do të përcaktohen me vendim të Këshillit të Ministrave.
Ligji parashikon gjithashtu që plani i vendosjes dhe përhapjes të rishikohet çdo pesë vjet ose më herët në rast të investimeve me rëndësi kombëtare, çka i jep institucioneve të zhvillimit ekonomik një instrument të ri për të kërkuar lirimin e pronave ushtarake me qëllim dhënien me koncension.
Ndryshimet ligjore, megjithëse të justifikuara si zhvillimore, lehtësojnë ndjeshëm heqjen nga funksioni ushtarak të pronave strategjike, veçanërisht në zona bregdetare apo pranë infrastrukturës kritike, ndërsa ërcaktimi i investimeve me “rëndësi të veçantë” nga ekzekutivi mund të krijojë presion politik për t’i liruar ose kaluar në përdorim civil prona që deri më tani kanë qenë në shërbim të kapaciteteve mbrojtëse.
Ligji hap mundësi për krijimin e enteve juridike të varura nga Ministria e Mbrojtjes që mund të administrojnë këto prona, duke e zhvendosur kontrollin real nga strukturat ushtarake drejt menaxhimit civil dhe ekonomik. /skyweb.al
