Kosova ka vendosur të ndërhyjë drejtpërdrejt në tregun e karburanteve për të frenuar rritjen e çmimeve, pas luhatjeve të forta në tregjet ndërkombëtare të energjisë të shkaktuara nga tensionet në Lindjen e Mesme.
Ministria e Tregtisë në Kosovë ka miratuar një vendim që vendos kufij të qartë për fitimin që mund të realizojnë kompanitë në tregun e naftës, me qëllim mbrojtjen e konsumatorëve dhe shmangien e rritjeve të pajustifikuara të çmimeve.
Sipas vendimit të nënshkruar nga ministrja Mimoza Kusari-Lila, marzhi maksimal i fitimit për shitjen me shumicë të derivateve të naftës do të jetë deri në 2 cent për litër. Ndërkohë, për shitjen me pakicë në pikat e karburantit, fitimi maksimal i lejuar është deri në 12 cent për litër.
Vendimi erdhi pas monitorimit të vazhdueshëm të tregut nga institucionet përgjegjëse. Analizat e të dhënave të Doganës së Kosovës dhe raportet e Inspektoratit Qendror të Mbikëqyrjes së Tregut treguan se çdo rritje e çmimeve të importit po reflektohej pothuajse menjëherë në çmimet e shitjes për konsumatorët.
Autoritetet në Kosovë e konsiderojnë këtë masë të domosdoshme për të ruajtur konkurrencën e ndershme dhe për të parandaluar spekulimet në treg, në një moment kur çmimet e energjisë po ndikohen nga zhvillimet gjeopolitike.
Ministria ka paralajmëruar se inspektorët do të jenë në terren për të kontrolluar zbatimin e vendimit. Çdo shkelje nga operatorët e tregut do të trajtohet sipas legjislacionit në fuqi. /skyweb.al
