Me ngrohjen e motit, poleni fillon të shkaktojë shqetësime për personat që vuajnë nga alergjitë sezonale, duke sjellë kruarje të syve, rrjedhje hundësh, vështirësi në frymëmarrje dhe teshtima. Për ata që e kanë të vështirë të përballojnë pranverën, ka disa mënyra për të lehtësuar simptomat. Tina Patel, opticiene për lente tek Feel Good Contacts, ka ndarë disa këshilla për të reduktuar efektet e alergjisë këtë sezon.
Këshilla e parë e saj është të mos hapni menjëherë të gjitha dritaret sapo moti të ngrohet. Edhe pse joshja për të futur ajër të freskët është e madhe, kjo mund të sjellë edhe polenin brenda shtëpisë. “Hapja e dritareve e ekspozon ambientin ndaj polenit që era mund ta ketë shpërndarë, duke shkaktuar irritim dhe lotim të syve, dhe është e vështirë ta largoni pasi të futet brenda. Për këtë arsye, pastroni rregullisht shtëpinë me fshesë me korent dhe fshijini sipërfaqet me leckë të lagur për të eliminuar polenin,” këshillon Tina.
Ajo gjithashtu sugjeron të shmangni vendosjen e luleve të freskëta në shtëpi, ose të paktën të zgjidhni lloje që nuk përkeqësojnë simptomat e alergjisë. “Edhe pse lulet e freskëta zbukurojnë ambientin, ato mund të rrisin ekspozimin ndaj polenit. Zgjidhni lule si trëndafilat, tulipanët, hortensiat, orkidetë dhe bozhuret, të cilat janë më të përshtatshme për personat me alergji,” shpjegon ajo.
Përveç kësaj, është e rëndësishme të minimizohet ekspozimi ndaj polenit jashtë shtëpisë. Tina rekomandon përdorimin e vazelinës rreth vrimave të hundës për të kapur pluhurin, polenin dhe alergjenët e tjerë para se të hyjnë në hundë. Po ashtu, bëni dush dhe ndryshoni rrobat sapo të ktheheni nga jashtë për të larguar polenin nga trupi dhe veshjet.
