Qeveria ka miratuar një skemë kompensimi për bizneset që preken nga rritja e pagës minimale në vend. Vendimi u miratua në mbledhjen e Këshillit të Ministrave dhe parashikon mbulimin nga buxheti i shtetit të kostos shtesë që u krijohet punëdhënësve nga rritja e kontributeve të sigurimeve shoqërore dhe shëndetësore.
Sipas vendimit të ri, shteti do të kompensojë çdo muaj kontributet e punëdhënësit në masën 16.7 për qind, të llogaritura mbi diferencën mes pagës së mëparshme dhe pagës së re minimale prej 50 mijë lekësh. Skema vlen për punonjësit që në shtator të vitit 2025 kanë pasur pagë bruto nga 40 mijë deri në 49 999 lekë.
Kompensimi do të jepet për periudhën kontributive janar – shtator 2026 dhe do të përfitohet nga subjektet private që kanë punonjës të deklaruar në këtë fashë page.
Përfitimi do të llogaritet mbi bazën e numrit maksimal të punonjësve që kanë qenë të deklaruar në listëpagesë në shtator 2025. Edhe në rast se një biznes redukton numrin e punonjësve, kompensimi do të jepet mbi një fond mesatar për punonjës, të shumëzuar me numrin aktual të të punësuarve.
Aplikimet për këtë skemë do të kryhen vetëm në mënyrë elektronike përmes portalit e-Albania. Subjektet mund të aplikojnë nga data 1 prill 2026 deri më 31 tetor 2026 për periudhën për të cilën kërkojnë kompensim.
Verifikimi i kërkesave do të bëhet përmes ndërveprimit elektronik të sistemeve shtetërore, ndërsa pagesat do të kryhen nga drejtoritë rajonale të Agjencisë Kombëtare të Punësimit dhe Aftësive. Pagesat do të kalojnë në llogaritë bankare të subjekteve përfituese brenda 10 ditëve të para të çdo muaji për kërkesat e muajit paraardhës.
Skema financohet nga buxheti i shtetit për vitin 2026 në kuadër të programit “Tregu i punës” të Ministrisë së Ekonomisë dhe Inovacionit.
Nga 1 janari 2026 paga minimale në Shqipëri u rrit me 10 mijë lekë, duke arritur në nivelin 50 mijë lekë. Skema e kompensimit synon të zbusë ndikimin e kësaj rritjeje te bizneset dhe të lehtësojë koston e tyre për sigurimet shoqërore dhe shëndetësore. /skyweb.al
