Agjencia e Ushqimit dhe Veterinarisë së Kosovës ka ndaluar përkohësisht importin e deleve dhe dhive nga Qarku i Shkodrës dhe Kukësit, pas konfirmimit të shpërthimit të sëmundjes së murtajës së bagëtive të imta (Peste des Petits Ruminants) në territorin shqiptar.
Sipas njoftimit zyrtar, ndalesa vjen si masë parandaluese pas raportimit të rasteve me PPR tek dhitë në zonën e Shkodrës. Në vijim, autoritetet kufitare të Kosovës do të shtojnë kontrollet në të gjitha pikat kufitare me Shqipërinë, me qëllim mbrojtjen e territorit kosovar nga përhapja e sëmundjes.
PPR është një sëmundje virale ngjitëse që prek kryesisht ripërtypësit e vegjël si delet dhe dhitë. Ajo transmetohet nëpërmjet kontaktit të drejtpërdrejtë me kafshët e infektuara, përmes sekrecioneve dhe jashtëqitjeve të tyre. Shenjat kryesore përfshijnë temperaturë të lartë, rrjedhje nga hunda, inflamacion të syve, humbje oreksi, diarre dhe në raste të rënda, ngordhje.
Megjithatë, autoritetet sqarojnë se kjo sëmundje nuk transmetohet tek njerëzit dhe nuk përbën rrezik për shëndetin publik.
Agjencia e Ushqimit dhe Veterinarisë, në bashkëpunim me institucionet e tjera, do të vijojë monitorimin dhe informimin e fermerëve dhe publikut për zhvillimet e mëtejshme, si dhe do të ndërmarrë masat e nevojshme për parandalimin e përhapjes së saj. /skyweb.al
