Qeveria pranon se çmimet e karburanteve janë rritur, por thekson se situata është më e përmbajtur krahasuar me zhvillimet në tregjet ndërkombëtare, duke lënë të kuptohet se konsumatorët duhet të jenë të kënaqur me nivelin aktual.
Ministrja e Ekonomisë dhe Inovacionit, Delina Ibrahimaj, deklaroi se çmimet e hidrokarbureve dhe ushqimeve po monitorohen çdo ditë nga një grup ekspertësh i përbërë nga tre ministri, në një kohë kur tregjet globale po përjetojnë luhatje të forta.
Sipas saj, shqetësimi kryesor në fillim ishte rreziku i ndërprerjes së furnizimit për shkak të tensioneve në Ngushticën e Hormuzit, por nga verifikimet rezulton se rezervat ligjore janë respektuar dhe furnizimi është i garantuar përmes kontratave afatgjata.
Ibrahimaj theksoi se rritja e çmimeve në Shqipëri ka qenë dukshëm më e ulët se në bursat ndërkombëtare. Ndërsa çmimi i karburanteve në tregjet globale është rritur me rreth 40 për qind, në vend rritja ka qenë vetëm 10 deri në 15 për qind.
“Në këto kushte nuk jemi në situatën për të ndërhyrë me masa shtesë”, u shpreh ministrja, duke përjashtuar për momentin rikthimin e Bordit të Transparencës.
Ajo nënvizoi se marzhi i fitimit të kompanive është mbajtur nën kontroll, rreth 8.5 për qind, më i ulët se niveli normal i operimit, çka sipas saj ka ndihmuar që rritja e çmimeve të mos përkthehet në fitime më të larta për operatorët.
Në të njëjtën kohë, qeveria po monitoron edhe tregun e ushqimeve, ku rreth 70 për qind e produkteve bazë janë nën vëzhgim dhe deri tani nuk janë konstatuar abuzime.
Sa i përket kërkesave të shoqatave të hidrokarbureve për ulje taksash, Ibrahimaj sqaroi se nuk ka vend për ndryshime në këtë moment. Ajo theksoi se modeli aktual i taksimit, i bazuar mbi konsumin për litër, mbetet në fuqi.
Ministrja garantoi se situata po ndiqet në mënyrë të përditshme dhe se çdo ndërhyrje do të bëhet vetëm nëse evidentohen abuzime ose luhatje të pajustifikuara në treg. /skyweb.al
