Shitjet në ekonomi rriten në shumicën e sektorëve, pasuritë e paluajtshme me kërcimin më të fortë
Indeksi i shitjeve neto në volum për tremujorin e katërt të vitit 2025 tregon një rritje të përgjithshme në pjesën më të madhe të sektorëve të ekonomisë, në krahasim me të njëjtën periudhë të një viti më parë.
Sektori me performancën më të fortë rezulton ai i pasurive të paluajtshme, ku shitjet janë rritur me 36,4 për qind, duke reflektuar një zgjerim të ndjeshëm të aktivitetit në tregun imobiliar.
Rritje të konsiderueshme janë shënuar edhe në sektorin e hoteleve me 12,3 për qind, si dhe në aktivitetet e arkitekturës dhe inxhinierisë me 8,3 për qind. Po ashtu, sektori i bar-restoranteve ka regjistruar një rritje prej 7,1 për qind, ndërsa transporti, magazinimi dhe posta janë rritur me 6,1 për qind.
Sektorë të tjerë kanë shënuar rritje më të moderuar. Tregtia me shumicë dhe pakicë, së bashku me riparimin e automjeteve, është rritur me 2,4 për qind, ndërsa administrimi i zyrave dhe mbështetja administrative me 2,9 për qind. Aktivitetet e sigurimit dhe hetimit janë rritur me 4,9 për qind, ndërsa agjencitë e udhëtimit me 3,8 për qind.
Nga ana tjetër, i vetmi sektor që ka shënuar rënie është ai i informacionit dhe komunikacionit, me një ulje prej 1,4 për qind.
Në tërësi, të dhënat tregojnë një ecuri pozitive të aktivitetit ekonomik në fund të vitit 2025, me rritje të shpërndarë në shumicën e sektorëve kryesorë. /skyweb.al
