Agjencia Kombëtare e Shoqërisë së Informacionit është kthyer në një institucion qokash dhe aferash, ku “gostit” firmat e mëdha dhe të preferuara, pavarësisht se ata ofrojnë më shumë në procedura tenderësh. I tillë është edhe procedura e radhës, që ka analizuar dhe hulumtuar redaksia e VoxNews.
Sipas dokumenteve, AKSHI i ka dhënë një tjetër tender të majmë Ermal Beqirit, një personazh i bërë publik vite më parë, në procesin Meta-Prifti në Gjykatën e Lartë. Më pas, ai iu fut firmave të teknologjisë së informacionit, ku tashmë zotëron dy prej tyre; Soft & Solution” dhe “Horizon”.
Këto dy firmat janë të “preferuarat” e AKSHI-t dhe drejtoreshës së këtij institucioni, Mirlinda Karçanaj. Me firmë të saj, Beqiri ka marrë dhjetëra miliona euro, teksa ka dyshime se edhe tenderët e hapur së fundmi do të kalojnë në “dorën” e tij.
Sipas dokumenteve që disponon VoxNews, AKSHI ka shpallur fituesit e tenderit me objekt “përmirësimi i sistemit të thesarit”, me fondet e Buxhetit të Shtetit, fondet e parashikuara nga vetë institucioni përfitues. Fondi ishte plot 750 milionë lekë ose 7.6 milionë euro.
Fitues u shpall BOE, i përbërë nga firma “COMMUNICATION PROGRESS” që do të bëjë 51.14 % të shërbimit dhe “H O R I Z O N” që ka një përqindje 48.86. mësohet se vlera e implementimit ka qenë 540 milionë dhe vlera e mirëmbajtjes 209 milionë lekë.
Pavarësisht se në dokumente shkruhet se përfiton “oferta ekonomikisht më e favorshme bazuar në çmim”, sërish fitoi oferta më e lartë!
Në dokumente saktësohet se mori pjesë firma “MetaSoft360” e cila nuk ka paraqitur ofertë. Edhe firma “NAOL” nuk paraqiti ofertë. Ofertën më të ulët e kishte BOE “Advanced Bussines Solution – ABS” dhe “DATALOG” me vlerë 511 milionë lekë.
Ndërkohë, BOE “COMMUNICATION PROGRESS” dhe “HORIZON” ofruan 679 milionë lekë, të cilët u shpallën çuditërisht fituese. Me një krahasim të thjeshtë rezulton se fituesit ofruan plot 168 milionë lekë më shumë sesa oferta më e ulët, ose rreth 1.7 milionë euro. Kaq shumë para ka AKSHI?!
Më pas, filloi operacioni i skualifikimit, teksa ajo që ofroi më pak u skualifikua për shkak se specifikimet teknike i përshtateshin më shumë fituesve! “ABS shpk dhe DATALOG do të përdornin servera të ofruar nga prodhuesi ‘Lenovo’. KVO konstaton se zgjidhja e ofruar nga BOE nuk përputhet me specifikimet teknike të kërkuara në këtë procedurë prokurimi, ç’ka përbën një rrezik themelor dhe të parashikuar që në këtë fazë, për zbatimin e kontratës në mënyrë të plotë” shkruhet në dokumente.
Sipas dokumenteve që hulumtoi VoxNews në QKB, rezulton se firma “COMMUNICATION PROGRESS” është në pronësi të Gentian Likaj dhe Enkeleidi Zoraqi. Ndërkohë, firma “HORIZON” është në pronësi të z. Ermal Beqiri. /voxnews.al
