Për herë të parë që nga periudha e pandemisë së Covid-19, prodhimi i naftës në Shtetet e Bashkuara pritet të shënojë një rënie gjatë vitit të ardhshëm, sipas parashikimeve nga Agjencia e Informacionit për Energjinë (EIA), pjesë e Departamentit të Energjisë.
Kjo rënie vjen në një moment delikat politik, pak muaj pas rizgjedhjes së Donald Trump, i cili e kishte shpallur prioritet rikthimin e fuqisë së SHBA-së në tregjet energjetike globale.
Sipas raportit të publikuar të martën, prodhimi ditor i naftës do të zbresë nga një rekord prej 13.5 milion fuçi në ditë në rreth 13.3 milion deri në fund të vitit të ardhshëm.
Rënia shpjegohet me uljen e ndjeshme të çmimeve të naftës, që po tronditin sektorin dhe po ndikojnë negativisht mbi aktivitetin e shpimit.
EIA vlerëson se do të ketë më pak puse të reja aktive deri në vitin 2026, pasi kompanitë amerikane po ngadalësojnë ritmin e shpimit për shkak të rentabilitetit të ulët.
Në vetëm një javë, numri i platformave të shpimit ra me 9 njësi, duke zbritur në 442, ndërsa janë 50 më pak se një vit më parë, sipas të dhënave të Baker Hughes.
Çmimi i naftës bruto West Texas Intermediate ra në 64.98 dollarë për fuçi, duke humbur 17% nga niveli më i lartë i këtij viti dhe duke qëndruar nën pragun e fitimprurjes për shumë prodhues shale.
Kriza e re në sektor shfaqet si një kundërthënie me premtimet e Trump për të “çliruar” industrinë amerikane të energjisë dhe për të ulur kostot për konsumatorët.
Por tensionet tregtare me vendet e tjera, tarifat për çelikun dhe aluminin, dhe konkurrenca e shtuar nga OPEC+ kanë krijuar një sfidë të re për industrinë amerikane të naftës.
Shefi i kompanisë së kapitalit privat Quantum Capital Group, Wil VanLoh, u shpreh i shqetësuar për mungesën e një strategjie të qartë nga administrata e re: “Po shkaktohet shumë kaos. Jam seriozisht i shqetësuar që nuk ka një plan të menduar mirë.”
Ndërkohë, S&P Global Commodity Insights parashikon një rënie edhe më të madhe të prodhimit amerikan, me një ulje prej 640 mijë fuçish në ditë nga mesi i vitit 2025 deri në fund të vitit të ardhshëm, më shumë se sa prodhojnë disa vende anëtare të OPEC.
Kjo shënon një kthesë dramatike për sektorin që dikur i dha SHBA-së statusin e prodhuesit më të madh të energjisë në botë. /FT
