Presidenti Donald Trump tha të premten se administrata e tij planifikon t’u kërkojë prodhuesve të vaksinave që disa vaksina të fëmijërisë t’i ndajnë në pesë doza të veçanta, për të cilat ai beson se do të sjellin një ulje të madhe të rasteve të autizmit, një ide që shkencëtarët e kanë hedhur poshtë vazhdimisht.
Trump nuk paraqiti asnjë provë shkencore që lidh vaksinat me autizmin. Ai gjithashtu nuk tha se cilat vaksina planifikon administrata t’i ndajë në doza më të vogla.
“Ne do të rekomandojmë që të bëhen pesë doza … dhe që ato të jepen në intervale prej gjashtë muajsh, në mënyrë që një sasi e vogël e vaksinës të futet në trup”, tha Trump gjatë një aktiviteti në Zyrën Ovale.
Trump kishte nënshkruar tashmë në gusht një urdhër ekzekutiv që bënte thirrje për më pak vaksinime në fëmijëri, duke e kufizuar kalendarin e vaksinimit në 11 imunizime. Ai tha se kjo do t’u jepte fëmijëve amerikanë mbrojtje “të standardit të artë” dhe do ta afronte SHBA-në me vendet e tjera të zhvilluara që rekomandojnë më pak vaksina.
Urdhri u kërkonte amerikanëve të merrnin vaksina të veçanta kundër fruthit, shytave dhe rubeolës, edhe pse asnjëra prej këtyre vaksinave individuale nuk është e licencuar në Shtetet e Bashkuara. Ekspertët thonë se mund të duhen vite përpara se ndonjëra prej tyre të bëhet e disponueshme, nëse do të bëhet ndonjëherë.
Urdhri avancon një objektiv të kahershëm të Sekretarit të Shëndetësisë, Robert F. Kennedy Jr., një aktivist kundër vaksinave, i cili ka promovuar një lidhje mes vaksinave dhe autizmit, lidhje që shkencëtarët e kanë hedhur poshtë vazhdimisht. /skyweb.al
