Deputeti i Partisë Socialiste, Erion Braçe, ka konfirmuar për herë të parë publikisht ambicien për të kandiduar për Bashkinë e Tiranës, duke sinjalizuar një lëvizje që po shihet si një përpjekje për të krijuar një bazë të fortë mbështetjeje nga brenda kampit socialist.
Braçe, i cili prej vitesh ka fokus politik Njësinë nr. 5 në Tiranë, një nga zonat më të forta elektorale të PS dhe shpesh e cilësuar si “Stalingradi socialist”, duket se po e ndërton kandidaturën pikërisht mbi këtë territor, duke e kthyer në pikën e nisjes së një projekti më të gjerë për kryeqytetin.
Në një reagim të drejtpërdrejtë me video, deputeti socialist është shprehur se vendimi i tij është i qartë dhe i vendosur. “E kam seriozisht dhe do t’i shkoj deri në fund”, deklaron Braçe, duke theksuar se kjo nuk është një ambicie personale, por një angazhim që, sipas tij, lidhet me një vizion për zhvillimin e qytetit.
Ai ka falënderuar mbështetësit për mesazhet dhe inkurajimin, ndërsa ka sqaruar edhe pikëpyetjet që janë ngritur në publik mbi seriozitetin e kandidaturës së tij.
“Nuk ka ndodhur kurrë që të tallem me njerëzit dhe nuk do të ndodhë. Po, e kam seriozisht dhe do t’i shkoj deri në fund bashkë me ju”, shprehet Braçe.
Deklaratat e tij vijnë në një moment kur brenda Partisë Socialiste duket se po intensifikohen diskutimet për garën në Tiranë, ndërsa lëvizja e Braçes interpretohet si një përpjekje për të kthyer mbështetjen lokale në një fakt të kryer politik.
Fokusi i tij në Njësinë nr. 5, një bastion tradicional i votave socialiste, shihet si një strategji për të ndërtuar një “kryengritje” të brendshme politike, duke e përdorur këtë zonë si bazë për të konsoliduar kandidaturën për drejtimin e kryeqytetit.
Në këtë kontekst, hyrja e Braçes në garë pritet të ndikojë në dinamikat brenda PS-së, duke hapur një debat më të gjerë për mënyrën se si do të përzgjidhet kandidati për Bashkinë e Tiranës dhe për balancat e brendshme në kampin qeverisës. /skyweb.al
