Katër astronautë u nisën të mërkurën nga Florida në kuadër të misionit Artemis II të NASA-s, një udhëtim rreth Hënës që përfaqëson hapin më të rëndësishëm të Shteteve të Bashkuara drejt rikthimit të njerëzve në sipërfaqen hënore, në një konkurrencë të drejtpërdrejtë me Kinën.
Raketa Space Launch System, e pajisur me kapsulën Orion, u lëshua pak para perëndimit të diellit nga Qendra Hapësinore Kennedy, duke transportuar për herë të parë një ekuipazh të përbërë nga tre astronautë amerikanë dhe një kanadez në orbitën e Tokës. Ky mision konsiderohet si një hap themelor për misionet e ardhshme, që synojnë ndërtimin e një baze në Hënë dhe hapjen e rrugës për eksplorime më të thella, përfshirë Marsin.
Sipas planit, ekuipazhi do të kryejë një fluturim rreth Hënës dhe do të rikthehet në Tokë pas një udhëtimi që zgjat rreth 10 ditë, duke testuar në maksimum kapacitetet e anijes dhe duke arritur më larg në hapësirë se çdo mision i mëparshëm me njerëz.
Artemis II është fluturimi i parë testues me ekuipazh në kuadër të programit Artemis, pasardhës i programit historik Apollo, dhe misioni i parë në më shumë se pesë dekada që dërgon astronautë përtej orbitës së Tokës, në afërsi të Hënës.
Ky mision përbën një provë kyçe për përpjekjet e NASA-s për të rikthyer njerëzit në sipërfaqen hënore pas afro 50 vitesh. Ekuipazhi do të udhëtojë deri në rreth 406 mijë kilometra larg Tokës, duke vendosur një rekord të ri për distancën më të madhe të përshkuar ndonjëherë nga njerëzit në hapësirë.
