Erërat e këqija nuk janë thjesht të pakëndshme, ato mund të ndikojnë edhe në shëndetin fizik dhe mendor. Për disa njerëz, si Elaine Corner në Angli, era nga impiantet e mbetjeve e bën të pamundur qëndrimin jashtë apo edhe hapjen e dritareve, duke shkaktuar nauze dhe shqetësim të vazhdueshëm, shkruan BBC.
Shkenca tregon se nuhatja është një sistem paralajmërues për rrezik. Truri reagon shumë shpejt ndaj aromave të këqija, duke na shtyrë të largohemi prej tyre, pasi ato shpesh lidhen me baktere apo substanca të dëmshme.
Përveç bezdisjes, erërat e pakëndshme lidhen me probleme shëndetësore si dhimbje koke, të përziera, vështirësi në frymëmarrje dhe gjumë të dobët. Ato mund të ndikojnë edhe në mirëqenien mendore, sidomos kur njerëzit shqetësohen për burimin e erës.
Jetesa me erë të keqe mund të detyrojë njerëzit të ndryshojnë stilin e jetesës, si mbyllja e dritareve apo shmangia e aktiviteteve jashtë – gjë që mund të ndikojë negativisht në shëndet dhe në jetën sociale.
Ndjeshmëria ndaj aromave ndryshon nga personi në person dhe nuk është e lehtë të mësohesh me erëra të pakëndshme, ndryshe nga aromat neutrale apo të mira.
Nga ana tjetër, një shqisë e mirë e nuhatjes është e rëndësishme për cilësinë e jetës. Ajo ndikon në kënaqësinë nga ushqimi dhe madje lidhet me shëndetin e përgjithshëm. Humbja e nuhatjes (anosmia) mund të çojë në oreks të dobët dhe rrezik më të lartë për sëmundje serioze. /skyweb.al
