Aeroporti i Vjenës ka nisur vendosjen e skanerëve të rinj të sigurisë, të cilët do t’u lejojnë pasagjerëve të transportojnë deri në 2 litra lëngje në bagazhin e dorës, duke lehtësuar ndjeshëm procedurat e kontrollit.
Sipas drejtuesve të aeroportit, pikat e kontrollit janë modernizuar prej disa muajsh dhe brenda dy javëve të ardhshme të gjitha pikat e sigurisë do të pajisen me teknologjinë e re.
Anëtari i bordit ekzekutiv të aeroportit, Julian Jäger, deklaroi se udhëtarët nuk do të kenë më nevojë të nxjerrin laptopët apo tabletët nga çantat gjatë kontrollit të sigurisë.
“Çdokush që nis pushimet në ditën e parë të sezonit veror mund të jetë i sigurt se në Vjenë nuk do të ketë më nevojë të nxjerrë laptopin ose iPad-in dhe do të mund të mbajë deri në dy litra lëngje”, tha ai.
Teknologjia e re synon të përshpejtojë kalimin në kontrollet e sigurisë dhe të përmirësojë përvojën e udhëtarëve, ndërsa Aeroporti i Vjenës bëhet një nga aeroportet e para në Europë që zbaton në shkallë të gjerë këtë sistem të avancuar skanimi./skyweb.al
