Tirana ka regjistruar një rritje të fortë të aksidenteve rrugore gjatë muajit maj 2026, duke ngritur pikëpyetje mbi efektivitetin e masave të Policisë Rrugore në kryeqytet.
Sipas të dhënave të INSTAT, në maj të këtij viti në Tiranë janë regjistruar 53 aksidente rrugore, nga 30 aksidente që ishin në të njëjtin muaj të vitit 2025.
Rritja është e ndjeshme edhe te personat e aksidentuar. Numri i të vrarëve dhe të plagosurve në Tiranë arriti në 69, nga 38 që ishte në maj të vitit të kaluar.
Të dhënat tregojnë se kryeqyteti po përballet me një përkeqësim të sigurisë rrugore.
Në rang vendi, INSTAT raporton se 94% e aksidenteve rrugore në maj kanë ndodhur si pasojë e sjelljes së drejtuesve të mjeteve.
Kjo tregon se problemi kryesor mbetet mënyra e drejtimit të automjeteve, shkelja e rregullave të qarkullimit, mosrespektimi i sinjalistikës dhe normave të shpejtësisë. /skyweb.al
