Një trend i ri po shfaqet në familjet moderne: rikthimi i telefonit fiks si mënyrë për të kufizuar përdorimin e ekraneve nga fëmijët. Prindërit po i drejtohen kësaj teknologjie “të vjetër” për të reduktuar varësinë nga smartfonët dhe për të nxitur komunikimin më të thjeshtë, shkruan Wall Street Journal,
Një shembull është Elsie Wright, një nxënëse e klasës së pestë, e cila kishte kërkuar për muaj me radhë një telefon. Në fund, për Krishtlindje, dëshira e saj u plotësua, por jo siç e kishte imagjinuar. Në vend të një smartphone-i modern, ajo mori një telefon fiks për shtëpinë.
Ky ndryshim po rezulton një përvojë e përzier për fëmijët. Nga njëra anë, telefoni fiks ofron një mënyrë më të kufizuar dhe më të kontrolluar komunikimi, pa aplikacione, rrjete sociale apo shpërqendrime të tjera dixhitale. Nga ana tjetër, shumë të rinj e kanë të vështirë të përshtaten me mungesën e privatësisë dhe fleksibilitetit që ofrojnë pajisjet moderne.
Prindërit e shohin këtë si një hap pozitiv drejt balancimit të kohës para ekranit, ndërsa fëmijët po zbulojnë një realitet të ri, ku komunikimi është më i thjeshtë, por edhe më pak i përshtatshëm për stilin e tyre të jetesës.
Rikthimi i telefonit fiks tregon se, mes shqetësimeve për ndikimin e teknologjisë, disa familje po kërkojnë zgjidhje në të kaluarën për të përmirësuar të tashmen. /skyweb.al
