Kryeministri Edi Rama ka konfirmuar edhe një herë orientimin e qeverisë drejt turizmit elitar, duke theksuar se jahtet do të vijojnë të përfitojnë nga politika fiskale lehtësuese.
Pas mbledhjes së Asamblesë së PS-së në Vlorë, ai zhvilloi një bashkëbisedim me operatorët turistikë ku u ndal te zhvillimi i marinave.
Rama u shpreh se qeveria nuk do të heqë taksat për makineritë që përdoren në bujqësi, por do të vazhdojë të mbajë të përjashtuar nga taksat karburantin për jahtet, duke e konsideruar këtë një zgjedhje ekonomike më të leverdishme për vendin.
Sipas tij, Vlora ka potencial të kthehet në një destinacion të ngjashëm me qytetet turistike të Spanjës apo Portugalisë, por kjo kërkon strategji dhe investime të qëndrueshme. Ai shtoi se disa vende, si Greqia, subvencionojnë operatorët turistikë, ndërsa Shqipëria po përpiqet të mbështesë sektorin në mënyrat e saj.
Në argumentimin e tij, Rama theksoi se jahtet sjellin përfitime të drejtpërdrejta për ekonominë, pasi turistët që udhëtojnë me to kanë fuqi të lartë konsumi dhe ndikojnë në rritjen e të ardhurave lokale.
“Kemi nevojë për më shumë marina. Vetëm gjatë dimrit, rreth 2500 persona që lëvizin me jahte mund të jenë konsumatorë aktivë në qytet”, u shpreh ai, duke e lidhur zhvillimin e këtij segmenti me rritjen ekonomike dhe turizmin cilësor. /skyweb.al
