Një pengmarrje e organizuar në detaje, që i ngjan skenarëve të filmave, ka ndodhur në Tiranë më 31 mars, në zonën e ish-Parkut të Autobusave.
Në qendër të saj është Florian Sula, 32 vjeç, i njohur publikisht si “biznesmen ndërtimi”, por që në prapaskenë përflitet si drejtues i rrjeteve të call center-ave dhe i dyshuar për mashtrim në shkallë të gjerë, pjesëmarrje në grup kriminal dhe pastrim parash përmes investimeve në ndërtim.
Ngjarja përbën alarm për drejtësinë pasi pengmarrësit ndërkohë rezultojnë djemtë e pronarit të Uba Bank duke lidhur interesa mes ndërtimit, call centerave dhe sistemit bankar në vendin tonë.
Sipas policisë, Sula është rrethuar nga tre persona teksa po shkonte drejt makinës së tij. Ata janë prezantuar si agjentë të BKH-së dhe, duke përdorur maska dhe aksesorë për të krijuar besueshmëri, e kanë detyruar të hipte në automjet. Më pas është transportuar në një magazinë në zonën e Xhafzotajt, ku është mbajtur nën kërcënim.
Autorët, Jurgen dhe Kevin Neza, përkatësisht 28 dhe 25 vjeç, së bashku me kushëririn e tyre Hysen Neza, 33 vjeç, fillimisht i kanë kërkuar 2 milionë euro.
Shkak për rrëmbimin dyshohet të jetë bërë një borxh prej rreth 30 mijë eurosh mes palëve. Pas refuzimit të Sulës për të paguar shumën e kërkuar, ai është dhunuar fizikisht dhe shuma është ulur fillimisht në 1 milion euro dhe më pas në 500 mijë euro.
Në fund, është liruar me kushtin që të siguronte paratë.
Pas lirimit, Sula është paraqitur në polici, çka ka çuar në arrestimin e Kevin Nezës dhe Hysen Nezës, ndërsa më pas është vënë në pranga edhe Jurgen Neza, i cili ishte shpallur në kërkim në kuadër të operacionit “Hijet”.
Sipas Zëri.ai, dy vëllezërit Neza rezultojnë të jenë djemtë e biznesmenit Gazment Neza, i njohur si pronar i UBA Bank dhe ortak në Eurosig Albania.
Po ashtu, të tre të arrestuarit rezultojnë me lidhje familjare me biznesmenin Kadri Morinaj, i cili zotëron kompani sigurimi si Eurosig dhe Insig, një element që po verifikohet nga hetuesit për të kuptuar nëse ka ndikuar në konfliktin mes palëve.
Raportime mediatike e lidhin Sulën me rrjete të mëdha mashtrimi financiar, ku përmenden edhe emra si Amant Josifi dhe Flladi Malaj.
Ai dyshohet se ka qenë aktiv në operimin e call center-ave që mashtronin qytetarë europianë përmes skemave të investimeve fiktive, duke gjeneruar të ardhura të konsiderueshme.
Pavarësisht mungesës së një aktiviteti të deklaruar biznesi apo të ardhurash të ligjshme, Sula ka investuar vitet e fundit në pasuri të paluajtshme, nga Tirana deri në jug të vendit.
Blerjet e pronave në zona si Borshi dhe Himara dyshohet se janë përdorur për zhvillim hotelesh dhe vilash turistike, një praktikë e njohur për riciklimin e parave me origjinë të dyshuar kriminale.
Rrëmbimi i tij përbën një akt të rëndë kriminal dhe dyshohet të jetë kryer nga një grup i strukturuar, aq më tepër me lidhje me sistemin bankar shqiptar, por paralelisht shtrohet edhe nevoja për një hetim të plotë ndaj vetë Sulës, për të sqaruar burimin e pasurisë, aktivitetet reale dhe rrjetin e mundshëm ku ai operon.
Ndërkohë, Policia dhe strukturat e hetimit të krimeve të rënda vijojnë verifikimet për të zbardhur të gjitha rrethanat dhe lidhjet që qëndrojnë pas kësaj ngjarjeje. /skyweb.al
