Sa herë rritet çmimi i karburanteve, zinxhiri i kostove nuk ndalet te pompat dhe rastet e marketeve. Goditjen e parë e marrin qytetarët, të cilët përveç çmimeve më të larta paguajnë edhe faturën e tekave të pronarëve të autobuseve qytetës, që në çdo krizë shtojnë presionin ndaj buxhetit të shtetit duke synuar të fusin edhe më tepër duart në xhepat e shqiptarëve.

Situata është konkretizuar sot në terren. Një ditë pas paralajmërimit zyrtar nga shoqatat e transportit, shërbimi është reduktuar me 40% të flotës. Efekti ka qenë i menjëhershëm, me vonesa të shumta dhe mbingarkesë në stacionet e Tiranës.

Qytetarët janë detyruar të presin gjatë për të siguruar një mjet transporti, ndërsa shumë prej tyre nuk kanë arritur të mbërrijnë në kohë në punë apo destinacionet e përditshme. Fluksi i lartë ka nxjerrë në pah varësinë e sistemit nga një sektor që reagon menjëherë sapo rriten kostot.

Operatorët argumentojnë se vendimi lidhet drejtpërdrejt me rritjen e çmimeve të karburantit dhe mungesën e mbështetjes institucionale. Sipas tyre, nuk është miratuar asnjë skemë kompensimi dhe nuk ka masa konkrete për lehtësimin e barrës financiare apo rishikimin e taksave.

Nga ana tjetër, kjo situatë përsërit një skenar të njohur. Sa herë ka krizë, kërkesat për subvencione apo mbështetje financiare rriten, duke e zhvendosur koston te buxheti i shtetit dhe në fund te qytetarët.

Shoqatat e transportit e cilësojnë reduktimin e shërbimit si masë të detyruar për të përballuar situatën ekonomike. Por në praktikë, rezultati mbetet i njëjtë: më pak autobusë në qarkullim dhe më shumë kosto për qytetarët. /skyweb.al