Në fund të vitit 2025 në Shqipëri kishte rreth 3.4 milionë lidhje celulare, një shifër që në pamje të parë duket shumë e lartë krahasuar me popullsinë e vendit. Në fakt, ky fenomen nuk është i pazakontë, pasi një pjesë e madhe e përdoruesve zotërojnë më shumë se një numër telefoni dhe periudha e fundvitit ka numër vizitorësh të lartë si dhe turistësh. Shpesh, i njëjti person përdor një lidhje për komunikime personale dhe një tjetër për punë, ndërsa zhvillimi i teknologjisë eSIM gjatë viteve të fundit e ka bërë këtë praktikë edhe më të thjeshtë dhe më të përhapur.
Nga ana tjetër, cilësia e lidhjeve duket se po përmirësohet ndjeshëm. Të dhënat e GSMA Intelligence tregojnë se rreth 88.5 % e lidhjeve celulare në Shqipëri tashmë mund të konsiderohen “broadband”, që do të thotë se ato funksionojnë përmes rrjeteve 3G, 4G ose 5G. Kjo tregon një avancim të infrastrukturës dhe një akses më të madh në shërbime më të shpejta dhe më moderne komunikimi.
Megjithatë, është e rëndësishme të theksohet se jo të gjitha këto lidhje “broadband” përdorin domosdoshmërisht internetin celular. Në shumë raste, përdoruesit kanë paketa që përfshijnë vetëm thirrje zanore dhe SMS, çka do të thotë se kjo përqindje nuk përfaqëson drejtpërdrejt nivelin real të përdorimit të internetit në celular në Shqipëri.
Ndërkohë, një tjetër tregues i rëndësishëm i zhvillimeve digjitale në vend vjen nga rrjetet sociale. Të dhënat më të fundit tregojnë se numri i përdoruesve që tregtarët mund të arrijnë përmes reklamave në Facebook në Shqipëri është rritur me rreth 100 mijë, ose 8.3%, vetëm në periudhën tre mujore nga korriku deri në tetor 2025. Kjo rritje tregon qartë se bizneset po orientohen gjithnjë e më shumë drejt platformave online për të arritur klientët e tyre. /tvscan.al
