Të gjitha transaksionet e pronave me vlerë më të madhe se 6 milionë lekë do të raportohen tek Agjencia e Inteligjencës Financiare, me qëllim që t’i nënshtrohen vlerësimit për pastrim parash.
Qeveria miratoi në mbledhjen e fundit një vendim, i cili detyron Agjencinë Shtetërore të Kadastrës të raportojë ccdo shitblerje prone me vlerë më shumë se 6 milionë lekë, brenda 72 orëve tek AIF sipas një formulari standard.
“Agjencia Shtetërore e Kadastrës raporton tek autoriteti përgjegjës, Agjencia e Inteligjencës Financiare, brenda 72 (shtatëdhjetë e dy) orëve, regjistrimin e kontratës së tjetërsimit të pronës, me një vlerë të barabartë ose më të madhe se 6 milionë lekë ose kundërvlerën e saj në monedha të tjera të huaja, sipas formularit përkatës,” thuhet në vendimin e Këshillit të Ministrave.
Në zbatim të këtij vendimi, drejtori i Përgjithshëm i Agjencisë Shtetërore të Kadastrës është i detyruar të caktojë në drejtorinë e përgjithshme një person që të shërbejë si person kontakti për Agjencinë e Inteligjencës Financiare.
Paralelisht ai detrohet të caktojë një person përgjegjës për parandalimin e pastrimit të parave dhe financimin e terrorizmit, në nivel administrimi ose drejtimi në drejtorinë e përgjithshme dhe në çdo drejtori vendore të saj, ku të gjithë punonjësit e Agjencisë Shtetërore të Kadastrës raportojnë çdo fakt, që mund të përbëjë dyshim për pastrim parash apo financim terrorizmi.
Kur Agjencia e Inteligjencës Financiare, ka bllokuar ose përgatitet të bllokojë një transaksion për 72 orë, sipas dispozitave të ligjit, apo në rastet urgjente kur ka arsye të bazuar për pastrim parash apo financim terrorizmi dhe ka nevojë urgjente për informacion nga Agjencia Shtetërore e Kadastrës, ajo i drejtohet zyrtarisht në formë të shkruar Kadastrës. Kjo e fundit është e detyruar që të përgjigjet në kohë të shkurtër.
“Agjencia Shtetërore e Kadastrës i vë në dispozicion autoritetit përgjegjës informacionin apo dokumentacionin e kërkuar, brenda 48 orëve nga paraqitja e kërkesës, apo nëpërmjet këqyrjes së informacionit në ambientet e Agjencisë Shtetërore të Kadastrës nga personat e autorizuar të autoritetit përgjegjës,” saktëson vendimi. /kapitali.al
