Qeveria shqiptare synon që deri në vitin 2030 të përfshijë rreth 20% të rrjetit rrugor në skema tarifimi elektronik. Kjo masë është pjesë e strategjisë sektoriale të transportit dhe lidhet me modernizimin e infrastrukturës.
Në fokus është zgjerimi i Sistemeve Inteligjente të Transportit, që përfshijnë menaxhimin në kohë reale të trafikut dhe informimin e udhëtarëve, raporton Monitor.al.
Një element kyç është vendosja e e-tolling në akset kryesore me trafik të lartë. Strategjia parashikon ndërtimin e kuadrit ligjor sipas standardeve europiane si Eurovignette dhe EETS. Pilotimi do të nisë në segmentet kryesore të rrjetit TEN-T.
Një fond i posaçëm do të krijohet nga tarifat rrugore dhe karikimi i mjeteve elektrike për mirëmbajtjen e rrugëve.
Aktualisht, disa akse janë me pagesë, si Rruga e Kombit, Thumanë–Kashar dhe tuneli i Llogarasë. Parashikohet edhe zgjerimi i biletimit digjital në transportin ndërqytetas. Qeveria vijon të mbështetet te PPP dhe koncesionet për zhvillimin e infrastrukturës.
Këto modele synojnë tërheqjen e investimeve private dhe përshpejtimin e projekteve. Në fokus është edhe modernizimi i terminaleve të transportit përmes PPP-ve. Paralelisht janë krijuar struktura të reja si EKORR për menaxhimin e rrugëve me pagesë.
Gjithashtu, shoqëria “Mob AI” do të merret me biletimin elektronik dhe menaxhimin e transportit publik. Strategjia synon rritjen e eficiencës, transparencës dhe integrimit të sistemit të transportit në vend. /skyweb.al
