Greqia ka vendosur të ndjekë një qasje të veçantë për të shmangur kaosin në aeroporte, duke mos zbatuar plotësisht sistemin e ri europian të hyrje-daljeve (EES) për shtetasit britanikë.
Që prej 10 prillit, vendet e zonës Schengen duhet të aplikojnë sistemin e ri që përfshin regjistrimin biometrik të udhëtarëve nga vendet e treta, përfshirë gjurmët e gishtërinjve dhe njohjen e fytyrës në hyrje, si dhe verifikime të mëvonshme në çdo kalim kufiri.
Kaosi me sistemin e ri të kontrollit, disa aeroporte europiane rikthejnë policët
Megjithatë, autoritetet greke kanë vendosur që për britanikët të mos zbatojnë këtë procedurë, duke i përjashtuar nga regjistrimi biometrik në pikat kufitare. Sipas drejtueses së Organizatës Kombëtare të Turizmit të Greqisë në Mbretërinë e Bashkuar, Eleni Skarveli, kjo masë synon të reduktojë ndjeshëm kohët e pritjes dhe të shmangë bllokimet në aeroporte.
Vendimi vjen në një moment kur shumë aeroporte europiane po përballen me radhë të gjata dhe probleme operacionale, si pasojë e zbatimit të sistemit të ri. Një nga rastet më problematike u regjistrua në aeroportin e Milanos, ku vonesat në kontrollin e pasaportave bllokuan kthimin e mbi 100 pasagjerëve të një fluturimi drejt Mançesterit.
Sipas autoriteteve greke, në praktikë kjo do të thotë se procedurat e hyrjes për britanikët do të mbeten të pandryshuara, si para hyrjes në fuqi të sistemit EES.
Ky vendim unilateral ngre pikëpyetje mbi zbatimin e njëtrajtshëm të rregullave në BE, por në të njëjtën kohë tregon presionin në rritje që sistemi i ri po krijon mbi kapacitetet kufitare të vendeve turistike, sidomos në prag të sezonit veror. /skyweb.al
