Një situatë e pazakontë është regjistruar në Francë, ku një fluturim i Ryanair është nisur drejt Marrakesh pa asnjë pasagjer në bord, për shkak të mungesës së stafit të sigurisë në aeroport.
Ngjarja ka ndodhur më 14 prill në aeroportin e Vatry, ku 192 pasagjerë, ndonëse kishin kryer procedurat e check-in, nuk kanë mundur të kalojnë kontrollin e sigurisë për të arritur në portën e imbarkimit.
Sipas autoriteteve aeroportuale, mungesa e personelit për kryerjen e kontrolleve të detyrueshme ka bllokuar të gjithë procesin.
Burimet zyrtare bëjnë me dije se stafi i sigurisë, i punësuar nga një kompani private kontraktore, kishte raportuar sëmundje, duke krijuar një mungesë të papritur.
Përpjekjet për të zëvendësuar personelin nuk kanë dhënë rezultat në kohë.
Drejtori i aeroportit, Fabrice Pauquet, ka deklaruar për mediat lokale se situata ishte e paparashikuar dhe se nuk ishte e mundur të mobilizohej staf alternativ për të garantuar vijimin normal të procedurave.
Pavarësisht mungesës së pasagjerëve, avioni është nisur sipas orarit për fluturimin rreth tre orë e gjysmë drejt Marrakesh, duke krijuar një precedent të pazakontë në operimet ajrore.
Ndërkohë, 192 pasagjerët kanë mbetur të bllokuar në aeroport, pa një zgjidhje të menjëhershme. Disa prej tyre kanë deklaruar se nuk kanë marrë ende kompensim dhe po kërkojnë sqarime edhe disa ditë pas incidentit.
Përgjegjësia për situatën mbetet e paqartë. Menaxhmenti i aeroportit ka deklaruar se kompensimi nuk është në kompetencën e tij, duke ia kaluar përgjegjësinë kompanisë ajrore.
Nga ana tjetër, Ryanair ka bërë të ditur se raste të tilla konsiderohen jashtë kontrollit të saj dhe nuk parashikojnë kompensim për pasagjerët. /skyweb.al
