Komisioni i Prokurimit Publik ka urdhëruar AKSHI-n për vijimin e procedurës së shpalljes së fituesit për tenderin me objekt “Mirëmbajtje e sistemit FER për Drejtorinë e Përgjithshme të Policisë së Shtetit”, një kontratë me fond limit rreth 350 mijë euro.
Procedura në fjalë, e shpallur në korrik 2025 dhe e planifikuar për t’u zhvilluar në gusht 2025, kishte mbetur e bllokuar për disa muaj për shkak të një serie ankimimesh të njëpasnjëshme nga operatorë ekonomikë, mes tyre edhe Gerond Meçe, përmes kompanisë “Advanced Business Solutions”.
Në vendimin e fundit që ka konsultuar skyweb.al, KPP konstaton se ankesa e paraqitur nga ABS është pranuar plotësisht nga vetë autoriteti kontraktor dhe shihet e udhës që të vijohet me shpalljen e fituesit.
Kompania kishte ngritur dy çështje kryesore: Së pari, mungesën e përgjigjes nga AKSHI ndaj kërkesave për sqarim brenda afatit ligjor 3-ditor, dhe së dyti, përcaktimin e datës së zhvillimit të tenderit në 13 prill 2026, një ditë që përkonte me pushim zyrtar.
Nga analiza rezulton se AKSHI nuk kishte kthyer përgjigje në kohë për kërkesat për sqarim, duke shkelur detyrimet procedurale dhe duke krijuar paqartësi për operatorët ekonomikë. Ndërsa për çështjen e datës, Komisioni vlerëson se nuk kemi shkelje ligjore, pasi afati shtyhet automatikisht në ditën pasardhëse pune, por thekson se kjo nuk ishte reflektuar qartë në sistem, duke cenuar transparencën e procedurës.
Duke qenë se ankesa është pranuar plotësisht nga autoriteti kontraktor, KPP ka vendosur mbylljen e çështjes dhe vijimin e procedurës, duke detyruar AKSHI të japë sqarimet e kërkuara dhe të reflektojë ndryshimet në dokumentet e tenderit.
Pse ka rendësi ky tender…
Tenderi për sistemin FER është pjesë e një pakete më të gjerë procedurash të AKSHI-t, të cilat për muaj me radhë u bllokuan nga ankimimet e vazhdueshme të kompanisë “Advanced Business Solutions”, e Gerond Meçes. Para se të nxirrej nga skena prej dyshes Ergys Agasi-Ermal Beqiri, Meçe konsiderohej një nga aktorët kyç të AKSHI-t, edhe për shkak të lidhjes së tij me Daniel Shimën.
Duke nisur nga prilli 2025, ankimimet e vazhdueshme kishin bllokuar për disa muaj një sërë procedurash, duke ndalur avancimin e kontratave në sektorin e teknologjisë së informacionit si edhe vijimin e skemës së zhvatjes përmes orientimit të tenderëve të kompanitë e lidhura me dyshen Agasi-Beqiri.
Gushti i vitit 2025, periudha kur u ankimua edhe ky tender, përkon me momentin kur Gerond Meçe u mor peng dhe u ushtrua presion për të hequr dorë nga këto ankimime.
Deri në atë kohë, veprimet e tij kishin bllokuar funksionimin normal të disa procedurave, duke krijuar një ngërç të gjatë në aktivitetin e prokurimeve të AKSHI-t, pra vijimin e planeve të dyshes Agasi-Beqiri.
Ky bllokim përmes ankimimeve dhe përplasjet e krijuara çuan në një përshkallëzim të situatës, ku Meçes iu kërkua të tërhiqej nga ankimimet jo vetëm për këtë tender, por edhe për procedura të tjera të ngjashme.
Prandaj, vendimi i fundit i KPP për zhbllokimin e tenderit të sistemit FER shënon një kthesë në vijimin e këtyre procedurave, duke i hapur rrugë rifillimit të kontratave të pezulluara prej muajsh në një nga sektorët më të ndjeshëm të prokurimeve publike në vend. /skyweb.al
