Gjykata e Lartë ka mbyllur përfundimisht betejën ligjore mes ish-drejtorit të Policisë së Shtetit, Gledis Nano, dhe qeverisë shqiptare, duke vendosur në favor të tij dhe duke lënë në fuqi detyrimin për dëmshpërblim pas shkarkimit nga detyra.
Në vendimin e saj, Gjykata e Lartë ka rrëzuar rekursin e paraqitur nga Këshilli i Ministrave dhe Ministria e Brendshme, të cilat kundërshtonin vendimet e mëparshme të gjykatave që i kishin dhënë të drejtë Nanos lidhur me largimin e tij nga posti vetëm rreth 11 muaj pas emërimit në krye të Policisë së Shtetit.
Ish-kryepolici e kishte konsideruar të paligjshëm shkarkimin e tij, duke argumentuar se vendimi ishte marrë nga kryeministri dhe ministri i Brendshëm i kohës, Blendi Çuçi, në kundërshtim me ligjin. Për këtë arsye, ai iu drejtua gjykatës, ku në të gjitha shkallët e gjyqësorit mori vendime në favor të tij.
Në thelb të çështjes ishte kërkesa për shfuqizimin e vendimit nr. 580, datë 31.08.2022 të Këshillit të Ministrave, si dhe detyrimi i institucioneve shtetërore për ta trajtuar me pagë deri në përfundim të mandatit 5-vjeçar, ose për ta sistemuar në një funksion tjetër brenda strukturave të Policisë së Shtetit.
Me vendimin e fundit, çështja konsiderohet e mbyllur dhe shteti mbetet i detyruar të zbatojë vendimet gjyqësore në favor të Nanos, duke i hapur rrugë edhe kompensimit financiar për periudhën e mbetur të mandatit. /skyweb.al
