Organizata Botërore e Shëndetësisë (OBSH) ka konfirmuar rastin e tetë me hantavirus të lidhur me anijen turistike MV Hondius, e cila ndodhet në Oqeanin Atlantik.
Sipas OBSH-së, janë identifikuar gjithsej tetë raste mes pasagjerëve të anijes, përfshirë tre viktima, një pacient në gjendje kritike dhe tre persona me simptoma të lehta. Autoritetet zvicerane konfirmuan gjithashtu një rast të ri të mërkurën, i zbuluar tek një pasagjer i kësaj anijeje.
Ndërkohë që origjina e saktë e shpërthimit mbetet ende në hetim, OBSH ka bërë të ditur se bëhet fjalë për variantin Andes të hantavirusit, i cili mund të transmetohet nga njeriu tek njeriu. Maria Van Kerkhove, drejtoreshë për përgatitjen dhe parandalimin e epidemive dhe pandemive në OBSH, deklaroi se ka gjasa që transmetimi të ketë ndodhur mes kontakteve shumë të afërta, si bashkëshortët apo personat që kanë ndarë kabinat.
Anija, ku është regjistruar shpërthimi, ndodhet aktualisht e ankoruar pranë Praia, kryeqytetit të Kepit të Gjelbër, dhe pritet të mbërrijë në Tenerife brenda tre ditësh.
Megjithatë, presidenti i Ishujve Kanarie, Fernando Clavijo, ka kundërshtuar vendimin e qeverisë spanjolle për ta pritur anijen në arkipelag. Nga ana tjetër, drejtori i përgjithshëm i OBSH-së, Tedros Adhanom Ghebreyesus, ka deklaruar se, bazuar në informacionet aktuale, rreziku për popullatën e përgjithshme mbetet i ulët.
Shumica e hantaviruseve nuk transmetohen drejtpërdrejt nga njeriu tek njeriu. Përjashtim bën varianti Andes, i cili gjendet kryesisht në disa zona të Amerikës së Jugut dhe mund të përhapet përmes kontakteve të ngushta dhe të zgjatura.
Hantavirusi është një grup virusesh që mbarten nga brejtësit dhe transmetohen tek njerëzit kryesisht përmes thithjes së grimcave të ajrit të kontaminuara nga jashtëqitjet e thata të tyre. Kontakti me urinën, pështymën apo jashtëqitjet e brejtësve të infektuar është mënyra kryesore e përhapjes.
Infeksioni mund të shkaktojë sindromën pulmonare nga hantavirusi (HPS), e cila shoqërohet me dhimbje koke, marramendje, ethe, të dridhura, dhimbje muskujsh dhe probleme gastrointestinale, e më pas me vështirësi në frymëmarrje dhe ulje të tensionit të gjakut.
Sipas OBSH-së, simptomat zakonisht shfaqen dy deri në katër javë pas ekspozimit, por mund të shfaqen edhe më herët, pas një jave, ose deri në tetë javë më vonë.
Anija MV Hondius, e operuar nga kompania holandeze Oceanwide Expeditions, kishte 149 persona në bord. Autoritetet lokale në Kepin e Gjelbër kanë refuzuar zbarkimin e pasagjerëve.
Spanja ka njoftuar se do ta pranojë anijen në Ishujt Kanarie, duke e justifikuar vendimin me arsye humanitare. OBSH ka bërë thirrje për respektimin e ligjit ndërkombëtar dhe “frymës humanitare”, duke theksuar se Kepi i Gjelbër nuk ka kapacitetet e nevojshme për të menaxhuar një situatë të tillë.
Megjithatë, presidenti i Ishujve Kanarie ka shprehur shqetësim, duke deklaruar se vendimi nuk garanton qetësi për popullsinë lokale dhe se mungojnë të dhënat e nevojshme për të siguruar mbrojtjen shëndetësore të rajonit. /skyweb.al
