Individët që kanë plotësuar Deklaratën Vjetore të të Ardhurave Personale, DIVA 2025, dhe rezultojnë me tatim të mbipaguar, kanë të drejtë të kërkojnë kompensimin e shumës.
Përfitues janë qytetarët që dalin me tepricë kreditore pas aplikimit të zbritjeve për fëmijët në ngarkim, por edhe individët pa fëmijë që rezultojnë me tatim të mbipaguar nga rillogaritja e detyrimit tatimor.
Sipas rregullave, zbritjet përfshijnë 48 mijë lekë në vit për çdo fëmijë në ngarkim, si dhe 120 mijë lekë për shpenzimet e arsimit. Pas përfundimit të aplikimit, kompensimi do të kalojë në llogarinë bankare të deklaruar nga individi në sistemin e-Filing.
Administrata Tatimore njofton se deklarimi i saktë i të dhënave bankare është i domosdoshëm për vijimin e procedurës së rimbursimit. Për këtë arsye, tatimpaguesit duhet të ngarkojnë në sistem dokumentin PDF me IBAN-in e llogarisë bankare, të lëshuar nga banka ku është regjistruar llogaria.
“Të gjithë individët që kanë plotësuar Deklaratën Vjetore të të Ardhurave Personale dhe rezultojnë me tatim të mbipaguar, për të cilin kanë paraqitur kërkesë për rimbursim, duhet të deklarojnë saktë të dhënat e llogarisë së tyre bankare në sistemin e-Filing. Siguroni që të dhënat e vendosura janë të sakta, për të shmangur vonesa në procesin e rimbursimit”, njoftojnë Tatimet.
Për herë të parë këtë vit, kompensim do të përfitojnë edhe individët pa fëmijë, nëse rezultojnë me tatim të mbipaguar për shkak të ndryshimit të mënyrës së rillogaritjes së tatimit. Procedura e aplikimit për ta është e njëjtë, me ndryshimin se nuk është i detyrueshëm ngarkimi i certifikatës familjare.
Më herët, ministri i Financave, Petrit Malaj, deklaroi se pas përfundimit të procesit të deklarimit më 31 mars, janë plotësuar 164,263 deklarata individuale të të ardhurave, me një rritje prej 25% krahasuar me të njëjtën periudhë të vitit të kaluar.
Sipas tij, rreth 77 mijë individë pritet të përfitojnë kompensim nga sistemi DIVA për fëmijët nën moshën 18 vjeç. Ndërkohë, sistemi ka gjeneruar një fond total prej 1.4 miliardë lekësh për rimbursim për individët me tepricë kreditore, ndërsa deri tani janë kërkuar vetëm 670 milionë lekë për t’u kaluar në llogaritë bankare.
Si deklarohet llogaria bankare në e-Filing
Për të plotësuar të dhënat bankare, qytetarët duhet të hyjnë në faqen zyrtare të e-Filing të Drejtorisë së Përgjithshme të Tatimeve, duke vendosur NID-in dhe fjalëkalimin.
Pas hyrjes në sistem, duhet të zgjidhet menuja “eFiling Im”, më pas opsioni “Profili Im”. Në faqen e profilit, nga menuja në të majtë, zgjidhet rubrika “Detajet e Bankës”.
Në këtë seksion shfaqet tabela e llogarive bankare. Nëse nuk ka llogari të regjistruar, përdoruesi duhet të klikojë butonin “Shto një llogari bankare” dhe të plotësojë formularin me të dhënat përkatëse.
Para plotësimit, individët duhet të kenë gati numrin IBAN, emrin e bankës dhe dokumentin bankar në format PDF që vërteton llogarinë. Tatimet paralajmërojnë se gabimet në të dhënat bankare mund të sjellin vonesa në procesin e rimbursimit.
