Banorët e vendeve të Mesdheut vazhdojnë të konsumojnë sasi të larta kripe dhe vetëm një në gjashtë persona arrin të respektojë kufirin e rekomanduar nga Organizata Botërore e Shëndetësisë, që është më pak se 5 gramë në ditë, raportoi repubblica.it.
Sipas të dhënave të studimit, personat e grupmoshës 35-74 vjeç konsumojnë ende më shumë kripë sesa rekomandohet. Burrat marrin mesatarisht 9.3 gramë kripë në ditë, ndërsa gratë rreth 7.1 gramë, nivele dukshëm mbi kufirin e vendosur nga OBSH.
Vetëm 11% e burrave dhe 24% e grave arrijnë të qëndrojnë brenda normës së rekomanduar ditore.
Megjithatë, gjatë dekadës së fundit është vërejtur një përmirësim gradual. Konsumi mesatar i kripës tek të rriturit është ulur me rreth 12%, kryesisht falë fushatave ndërgjegjësuese dhe masave parandaluese të ndërmarra nga autoritetet shëndetësore.
Ekspertët e Instituti Kombëtar Italian i Shëndetësisë theksojnë se reduktimi i konsumit të kripës është thelbësor për parandalimin e hipertensionit dhe uljen e rrezikut të sëmundjeve kardiovaskulare, si ataku në zemër dhe goditja në tru.
Përveç kësaj, marrja e tepërt e kripës lidhet edhe me një rrezik më të lartë për zhvillimin e sëmundjeve të veshkave, osteoporozës dhe disa formave të kancerit.
Specialistët rekomandojnë disa ndryshime të thjeshta në përditshmëri, si përdorimi i bimëve aromatike, erëzave, hudhrës dhe agrumeve për t’i dhënë shije ushqimeve, në vend të përdorimit të tepërt të kripës./Skyweb.al
