Vetëm në gjashtë muaj, qytetarët dhe bizneset shqiptare kanë kryer rreth 363 mijë transferta hyrëse dhe dalëse përmes Sistemit Unik të Pagesave në Euro, SEPA, me një vlerë totale prej 4.3 miliardë eurosh.
Të dhënat u bënë publike gjatë Forumit Ballkanik të Pagesave, ku u theksua se Shqipëria ka regjistruar një ulje të ndjeshme të kostove të transfertave ndërkufitare që prej nisjes së operimit me SEPA më 7 tetor të vitit të kaluar.
Sipas shifrave të prezantuara në forum, kostot mesatare të transfertave me vlerë të vogël dhe mesatare kanë rënë nga 0.76% në vetëm 0.08%, ndërsa për transfertat e mëdha kanë zbritur në 0.02%, një reduktim prej 23 herësh.
Në forum u theksua se rezultatet kanë tejkaluar pritshmëritë fillestare të sektorit bankar, ndërsa ndikimi më i madh është ndjerë te remitancat, të cilat përbëjnë një burim të rëndësishëm të ardhurash për familjet shqiptare.
Tarifat më të ulëta po përkthehen në më shumë para që mbeten në duart e qytetarëve, ndërsa sistemi SEPA po ndihmon edhe tregtinë dhe klimën e biznesit me vendet e Bashkimit Europian.
Një tjetër tregues i rëndësishëm është rritja e përdorimit të kanaleve digjitale. Më shumë se gjysma e transfertave dalëse janë iniciuar online, ndërsa sipas të dhënave të prezantuara në forum, rreth 68% e transfertave janë kryer përmes platformave digjitale.
Gjithashtu, u bë e ditur se kursimet totale nga përdorimi i SEPA-s mund të arrijnë deri në 70 milionë euro vetëm gjatë vitit të parë të funksionimit.
Në forum u theksua se anëtarësimi i Shqipërisë në SEPA konsiderohet një hap historik për integrimin financiar të vendit dhe për modernizimin e sistemit të pagesave elektronike. /skyweb.al
