“Sigurimi nuk duhet të konsiderohet thjesht si një produkt tjetër financiar, por si një mekanizëm besimi dhe rimëkëmbjeje”. Ky ishte mesazhi kryesor i forumit ndërkombëtar mbi menaxhimin e rreziqeve nga katastrofat natyrore dhe modelet e sigurimit, organizuar nga Autoriteti i Mbikëqyrjes Financiare në bashkëpunim me Shoqatën e Siguruesve të Shqipërisë dhe AON Reinsurance.
Drejtoresha Ekzekutive e AMF-së, Adela Xhemali, deklaroi se Shqipëria ka nevojë për më shumë ndërgjegjësim dhe produkte sigurimi më të kuptueshme dhe të përballueshme për qytetarët.
“Sigurimi nuk duhet të konsiderohet thjesht si një produkt tjetër financiar, duhet të konsiderohet si investim, mekanizëm besimi, një premtim rikuperimi dhe rimëkëmbjeje, shtyllë qëndrueshmërie”, u shpreh Xhemali.
Ajo theksoi se për të ulur cenueshmërinë ndaj fatkeqësive natyrore nevojiten më shumë sigurime, kanale më të forta shpërndarjeje dhe produkte që qytetarët “i kuptojnë, mund t’i besojnë dhe mbi të gjitha t’i përballojnë”.
Në forum foli edhe ministrja e Ekonomisë dhe Inovacionit, Delina Ibrahimaj, e cila tha se Shqipëria mbetet një nga vendet më të ekspozuara ndaj fatkeqësive natyrore në Europë.
Sipas saj, rreth 86% e territorit dhe mbi 88% e popullsisë janë të ekspozuara ndaj këtyre rreziqeve, ndërsa përvoja e tërmetit të vitit 2019 tregoi nevojën për mekanizma më të fortë mbrojtjeje dhe sigurimi.
Ndërsa kryetarja e Komisionit Parlamentar për Ekonominë, Milva Ekonomi, deklaroi se Shqipëria vijon të mbështetet kryesisht te rialokimet buxhetore, huamarrja dhe ndihmat e donatorëve për përballimin e dëmeve nga katastrofat natyrore, duke e cilësuar forcimin e kulturës së sigurimit si një prioritet kombëtar. /skyweb.al
