Bitcoin ka rënë në nivelin më të ulët në më shumë se dy javë, ndërsa tensionet mes Shteteve të Bashkuara dhe Iranit po shtojnë pasigurinë në tregjet financiare globale dhe po godasin asetet me rrezik të lartë.
Kriptomonedha më e madhe në botë zbriti deri në 76,711 dollarë gjatë tregtimit të së hënës, niveli më i ulët që prej 1 majit, përpara se të rikuperonte një pjesë të humbjeve. Në rënie u përfshinë edhe valuta të tjera digjitale si Ether dhe Solana.
Sipas të dhënave të Coinglass, tregu i kriptomonedhave pësoi likuidime masive të pozicioneve optimiste, me afro 500 milionë dollarë të fshirë brenda vetëm pak minutash gjatë orëve të para të tregtimit në Azi.
Presioni mbi Bitcoin është rritur ndjeshëm ditët e fundit, pasi investitorët po reagojnë ndaj klimës së tensionuar gjeopolitike dhe frikës për përshkallëzim të konfliktit SHBA-Iran. Analistët theksojnë se asetet me rrezik të lartë po goditen nga ulja e oreksit për investime agresive.
“Rënia e Bitcoin është një histori tërësisht makroekonomike. Oreksi për rrezik është rivlerësuar dhe Bitcoin po lëviz në të njëjtin drejtim”, deklaroi Rachel Lucas, analiste në BTC Markets.
Në të njëjtën kohë, fondet Spot Bitcoin ETF të tregtuara në SHBA regjistruan dalje kapitali mbi 1 miliard dollarë gjatë javës së kaluar, për herë të parë që nga fundi i janarit, duke sinjalizuar dobësim të interesit të investitorëve institucionalë.
Ndërkohë, tregjet globale po përballen edhe me rritjen e çmimeve të naftës, rënien e bursave aziatike dhe rritjen e interesave të bonove, në një klimë të dominuar nga shqetësimet për ngushticën e Hormuzit, një nga korridoret më të rëndësishme të tregtisë energjetike në botë.
Sipas analistëve, rënia e Bitcoin u përshpejtua pasi çmimi humbi mbështetjen teknike pranë nivelit 77,800 dollarë. Vetëm gjatë disa orëve të tregtimit në Azi u mbyllën pozicione “long” me vlerë rreth 550 milionë dollarë.
Rachel Lucas vlerëson se zona kryesore e mbështetjes teknike mbetet mes 76,000 dhe 76,800 dollarëve, ndërsa rikthimi mbi 80,000 dollarë do të ishte sinjali i parë i rëndësishëm që presioni i shitjeve po zbehet.
Sipas të dhënave të Deribit, investitorët kanë shtuar bastet për rënie të mëtejshme të Bitcoin, me dhjetëra milionë dollarë të investuar në opsione “put”, duke reflektuar ndjenjën negative që po dominon tregun. /skyweb.al
